Рождестволық кездесу : ақпараттық сағат

24 желтоқсан күні Абай кітапханасында кітапхана оқырмандары мен «Ағылшын сөйлесу клубының» қатысушыларына арналған шетелдерде Рождество мерекесін тойлау дәстүрлері туралы ақпараттық сағат өтті.
Іс-шара барысында қатысушылар Рождество мерекесінің тарихымен, салт-дәстүрлері және әдет-ғұрыптарымен танысты. Рождестволық шыршаны безендіру дәстүрі Германиядан бастау алса, ал рождестволық әнұран айту дәстүрі Англиядан таралғаны туралы мәлімет берілді.
Француздар Жаңа жылда сәттілік әкеледі деп сеніп, шыршаның орнына үйдің есігіне омела бұтағын ілуді дәстүрге айналдырған. Ал Италияда Рождество қарсаңында сиқыршы Бефана балаларға арнап шұлықтарға сыйлықтар салады деген сенім бар.
Іс-шара барысында «Christmas quiz», «Christmas statements» атты танымдық ойындар ұйымдастырылды. Барлық қатысушылар тегін мерекелік лотереяға қатысып, шағын рождестволық сыйлықтарға ие болды.
Сондай-ақ, «Christmas» (C. Miller), «Celebrate! Holidays in the USA», «Hometown Recipes for Holidays», «Autumn–Winter Holidays», «Елтану» (Б. Стерсіз) сынды кітаптардан құралған тақырыптық кітап көрмесі ұйымдастырылды.