Ұлтының жаны мен жүрегіне айналған өнерпаз: виртуалды көрме
Сәуір айының 13-ші жұлдызында Абай атындағы кітапханада әнші, сазгер, актер, ҚР мәдениет қызметкері, Мұқағали Мақатаев атындағы сыйлықтың иегері Тұрсынғазы Рахимовтың туғанына 65 жыл толуы қарсаңында «Ұлтының жаны мен жүрегіне айналған өнерпаз» тақырыбында «Әнге ғашық жүрек», «Актерлық қыры», «Әндер тарихы», «Өмірім – өнерім», «Арнаулар», «Кітаптар», «Бейнежазбалар», «Фотогалерея», «Сілтемелер», «Библиография» атты 10 бөлімнен тұратын виртуалды көрме ұйымдастырды.
Көрменің мақсаты: кітапхана қорындағы және сазгердің жеке қорындағы, сондай-ақ сазгер шығармашылығына байланысты мол материалдарды оқырман ортасына ұсынып, пайдаланушыларды семейлік өнерпаз Тұрсынғазы Рахимовтың өмірімен, шығармашылығымен кеңінен таныстыру, пайдаланушылардың ақпаратқа қолжетімділігін арттыру. Жалпы көрмеге кітапхана қорында сақталған басылымдар беттерінде жарық көрген 20-дан аса мақалалардың толық мәтіні, ақындардың басылымдар беттеріндегі, қойын дәптерлерінде жүрген сазгерге арнау өлеңдері, сазгердің жек қорынан алынған фотосуреттер, «Қазақстан-Семей» телеарнасы қорынан алынған бейне бағдарламалар, сазгер шығармашылығы туралы кітапхана жаздырып алған бейнематериалдар, библиографиялық тізім мен Интернетке сілтемелер ұсынылды.
Шара барысында. жиналған қауым Т.Рахимовтың өмірі мен шығармашылығы жайында кітапхананың дайындаған Есмұқан Обаев, Еркін Шүкіманов, Толу Сембаев сынды сазгердің өнерін бағалайтын өнер тарландары мен үзеңгілес інілерінің аузынан жазылып алынған бейнематериалдарын тыңдап, шәкірттері шығармашылығынан әндерін орындады.
Аталмыш шараға кітапхана пайдаланушылары, Тұрсынғазы Рахимовтың отбасы мен туған-туыстары, зиялы қауым өкілдері, өзі қызмет еткен облыстық Әміре Қашаубаев атындағы филармония мен Мұқан Төлебаев атындағы музыкалық колледждің қызметкерлері, М.Әуезов атындағы педагогикалық және М.Төлебаев атындағы музыкалық колледждердің студенттері қатысты. Шара соңында ақынның жары Фатима қонақтар мен кітапхана ұжымына алғысын білдірді.
Виртуалды көрме Тұрсынғазы Рахимовтың өмірі мен шығармашылығына байланысты Интернет пайдаланушыларына (http://www.semeylib.kz/) қажетті ақпараттар іздеуде таптырмас көмекші бола алады. Көрме қоры алдағы уақытта үнемі толықтырылып, оқырмандарды тың ақпараттармен қамтамасыз етіп отырады.