Ақиық ақын Мұқағали жырлары: дөңгелек үстел

20 сәуір күні Абай атындағы кітапхананың «Поэзия бұлағы» ақындар клубы қазақтың ақиық ақыны – Мұқағали Мақатаевтың туғанына 85 жыл толуына орай «Ақиық ақын Мұқағали жырлары» атты дөңгелек үстел өткізді.

Шараның жыр пердесін Н.Орынбаев, Д.Какимова, Ж.Ғалымова, Ж.Қамбарова, Қ.Тлеуғабыл, Қ.Бақырбаев сынды жас ақындар жүректерінен шыққан тебіреніске толы ақынға деген жыр арнау, шумақтарымен бастады. Аталмыш іс-шарада дара ақын М.Мақатаев туралы «Мұқым елдің Мұзбалағы» атты деректі фильм жиналған қауым назарына ұсынылды. Бұл фильм ақын өмірінен сыр шерте отырып, ғұмыр жолы туралы деректі ақпараттарды қатысушылар жүрегіне жеткізді. Жас ақындар тек қана арнаумен шектелмей, халық арасында кеңінен тараған ақын өлеңдерін нақышына салып, әуеге қалықтатты.

Жиналған жастар қауымы «Ақын жырлары әр қазақтың жүрегінде. Тәңірі сыйлаған талантымен халқына танылған Мұқағали жырлары мәңгіге жасамақ» деген ой айтысып, тарқасты. Шараға арнайы «Поэзия әлемінің адал перзенті» атты кітап көрмесі жасақталып, шолу жасалды.
Кітапхана ұжымы «Мұзбалақ ақынның» соңынан ерген балауса ақындарға қарымды қадам, жарқын болашақ тілейді!