Шәуешек қаласының кітапханасы: саяхат
Абай атындағы кітапхана қызметкерлері Бүкілдүниежүзілік кітап және авторлық құқық күні қарсаңында Қытай Халық Республикасының Шыңжаң Ұйғыр Автономиялы ауданына туристік сапармен барып қайтты.
Кітапханадан барған делегация тобын Тарбағатай ауданы әкімшілігінің сыртқы істер бөлімі бойынша орынбасары Әден Манап қарсы алып, аймақтың тарихы мен мәдениеті туралы әңгімелеп, қаладағы мәдени мекемелерге саяхатқа апарды. Сапар барысында кітапхана қызметкерлері Шәуешек қаласының рухани орындары Молотов мұражайы мен Тарбағатай ауданы кітапханасында болып, маңызды да, әсерлі ақпараттар алды.
Көршілес аспан асты елінің кітапхана қызметімен танысу, тәжірибе алмасу мақсатындағы сапарымызда кітапхана әкімшілігі басшысы Жан Чуа Мин ханым кітапхананың тыныс-тіршілігімен таныстырды. 70 мыңға жуық қазақ тілді тұрғыны бар қаладағы кітапхана оқырман қауымның жиі бас қосатын, ақпараттар алатын мәдени орталық екендігі жайлы әңгімеледі. Кітапхана қорындағы төте жазумен жарық көрген қазақ авторларының шығармаларына баса назар аудардық. Қордағы қазақ, ұйғыр, қытай, тілдеріндегі Абай шығармалары оқырман қауымның көп сұранысқа ие кітаптар екендігі бізді ерекше қуанышты сезімге бөледі. Мектеп оқушыларының күнделікті үй тапсырмасын кітапхананың оқу залына келіп орындауы кітапхана қызметінде қалыптасқан дәстүр екен. Кең, әсем ғимаратта орналасқан өте сапалы және ыңғайлы жасалған жиһаздар ерекше әсер қалдырды.
Біз Тарбағатай ауданы кітапханасы оқырмандарына қазақ тіліндегі Абай шығармаларын, Мұхтар Әуезовтің «Абай жолы» роман-эпопеясын, ағылшын тіліндегі Қазақстан жайлы жазылған кітаптармен, кітапханамыз жайлы буклеттерді сыйға тарттық.
Саяхат соңында екі елдің кітапханашы мамандары әріптестік іс-сапарлар әлі де жалғасын табады деген сеніммен тарасты.