Әлихан Бөкейхан және тәуелсіздік мұраты – халықаралық ғылыми-тәжірибелік конференция

  • 20.04.2016

20 сәуір 2016 жылы Абай атындағы кітапхана қызметкерлері Астана қаласында Л. Н.Гумилев Еуразия Ұлттық Университетінде өткен «Әлихан Бөкейхан және тәуелсіздік мұраты» атты тақырыптағы халықаралық ғылыми-тәжірибелік конференциясына қатысып қайтты.

Конференцияға көптеген тарихшы ғалымдар мен Жапонияның Қазақстан Республикасындағы төтенше және өкілетті елшісі Итиро Кавабата, Ахмет Ясауи университеті Өкілетті Кеңес төрағасы М. Йылдыз, Гази университетінің «Түркітану» ғылыми-зерттеу орталығының директоры Хулия Касапоғұлу Ченгел, тарих ғылымдарының докторы, профессор Дина Ахметжанқызы Аманжолова т.б. қатысып, баяндамалар оқыды.

28

Конференция барысында Алаш партиясының ұйымдастырушысы және ұлттық Алашорда автономиялы үкіметінің төрағасы, ғұлама ғалым – ормантанушы, экономист, тарихшы, этнограф, әдебиеттанушы, аудармашы, әрі дарынды публицист Ә.Н.Бөкейханның ұлтымыздың экономикасы, мәдениеті дамуына қосқан үлесі жан-жақты сарапталды. Кітапхана қорына Әлихан Бөкейханның туғанына 150 жыл толуы мен Қазақстан Республикасы тәуелсіздігінің 25 жылдығына арналған «Әлихан Бөкейхан және тәуелсіздік мұраты» атты халықаралық ғылыми-тәжірибелік конференция материалдары атты жинақ сыйға тартылып, кітапхана қоры ұлт көсемі Ә. Бөкейхан жайындағы тағы бір құнды жинақпен толықты.

Әлихан Бөкейханның 150 жылдығы мен Қазақстан Республикасының тәуелсіздігінің 25 жылдығына арналған Әлихан Бөкейхан және тәуелсіздік мұраты» атты халықаралық ғылыми-тәжірибелік конференция ұлт көсемінің тағылымды қайраткерлік өмірін, ғаламдық ақыл-ой өрісіндегі әдеби және ғылыми мұрасын саралау және зерделеу мақсатында ұйымдастырылды. Конференция барысында тұңғыш рет «Алаш» күйі орындалып, түстен кейін секциялық отырыстармен жалғасын тапты.