Өткені – өнеге, бүгіні – бекем, болашағы жарқын – Семей: кітап көрмесі

24 қыркүйек күні Қала күні мерекесіне орай Абай атындағы әмбебап кітапханасында «Өткені – өнеге, бүгіні – бекем, болашағы жарқын – Семей» тақырыбында кітап көрмесі ұйымдастырылып, кітапхананың бай өлкетану қорына шолу жасалды.
Семей – 300 мыңнан артық халқы бар еліміздегі үлкен әрі ежелгі қалалардың бірі. Бұл өңірдің тарихы орасан бай, рухани тынысы кең, «ұлылар мекені» деп аталған айрықша атырап. Шараның мақсаты: өскелең ұрпаққа Семей шаһарының тарихы туралы ақпарат беру, олардың туған қаласына деген патриоттық, сүйіспеншілік сезімін ояту, кітап оқуға деген қызығушылықтарын арттыру. Көрмеге Семей қаласының тарихы, мәдениеті, білім және ғылым ошақтары, экономикасы туралы мағлұмат беретін 30-дан аса кітаптар мен мерізімді басылымдар қойылды. Атап айтсақ: Ә.Сәдуақасұлының «Семей өңірінің құрметті азаматтары», В.Н.Кашляктың «Семипалатинское купечество: Плещеевы», «Храмы Семипалатинска: прошлое и настоящее», Ж.Қасымбаевтың «История города Семипалатинска (1718–1917)», Д.Сейсенұлының «Семей елі, жері» т.б. Аталмыш шараға кітапхана пайдаланушылары, қала қонақтары, М.О.Әуезов атындағы педагогикалық колледждің студенттері қатысып, қала тарихына байланысты ұсынылған ақпараттарға ерекше қызығушылықтарын танытты.