Қожа Ахмет Яссауи кесенесі: бейне-экскурсия

Биылғы жыл ЮНЕСКО көлемінде «Қожа Ахмет Яссауи жылы» болып жарияланды. Демек, әлем халықтарының назары Қазақстанға ауатын, Ұлы Дала Елінің асқаралы рухын асқақтата түсетін абыройлы жыл болды. Атаулы оқиғаға орай Қожа Ахмет Яссауидің өмірден қайтқанына 850 жылдығына арнап 28 қыркүйекте кітапхана қызметкерлері ағылшын тілінде «Қожа Ахмет Яссауи кесенесі» атты бейне-экскурсия өткізді.

Шара барысында студенттерге Қожа Ахмет Яссауи – түркі халықтары рухани мәдениетінің барлық саласында – әдебиетінде, тарихында, мәдениетінде, дүниетанымында, ойлау жүйесінде өшпес із қалдырған дара шығармашылық иесі, бірегей рухани – моральдық ілімнің негізін салушы тұлға болғандығы жайында тәрбиелік мәні бар ақпараттар берілді.

Бейне – экскурсияға қатысушы электротехникалық колледж студенттеріне арнайы викториналық сұрақтар қойылып, слайд көрсетілімі ұсынылды. «Қожа Ахмет Яссауи хикметтері – тәрбиенің қайнар көзі» атты кітап көрмесіне шолу жасалып, кітап қорындағы Қожа Ахмет Яссауи шығармашылығына қатысты басылымдардың алынып, оқуларына ықпал етілді.