Ахметова Лайла Сейсембекқызы «1941. Брестская крепость. Казахстан»: кітаптың тұсаукесері
9 қараша күні Абай атындағы кітапханада тарих ғылымдарының докторы, әл-Фараби атындағы ҚазҰУ-нің ЮНЕСКО, халықаралық журналистика және қоғаммен байланыс кафедрасының профессоры – Ахметова Лайла Сейсембекқызының «1941. Брестская крепость. Казахстан» кітабының тұсаукесері өтті. Кітап Қазақстан Республикасы Тұңғыш Президенті – Елбасы қорының қаржылық қолдауымен, Ұлы Отан соғысының басталуының және Брест қамалын қорғаудың 75 жылдығы құрметіне шығарылған.
Кітапта соғысқа дейінгі жылдардағы және 1941 жылы Брест қамалындағы оқиғалар, оған қазақстандықтардың қатысуы суреттелген. Қазақстан, Беларусь, Ресей, Польша, Германия мұрағаттар, мұражайлар және кітапханалардағы іздеушілердің жұмыстары көрсетілген. Табылған 556 қазақстандықтардың тізімдері басылып шығарылған. Брест қамалының қорғаушылары және Қазақ КСР-ден барған, сол бағытта соғысқан 200-ден астам адамдар, одан басқа полк және әскери бөлімшелер бойынша Қазақстаннан барған қамал қорғауға қатысушылардың тізімдері берілген. Мұрағат материалдары және басқа құжаттар бойынша, 1941 жылдың 22 маусымында Брест қамалында болған түрлі полктар мен құрамаларының қызыл әскерлерінің жауынгерлік әрекеттері суреттелген.
Лайла Сейсембекқызы осы кітаптың жазылу барысымен, қажетті деректерді іздеу кезінде басқа мемлекеттердің мұрағаттарындағы жұмыс істеу бағыттарымен слайд көрсетілімдері арқылы таныстырды.
Осы үлкен ауқымды жобаның жарыққа шыққанына Ұлы Отан соғысының ардагерлері Топатаев Исағали Иманқұлұлы, Петр Михайлович Коломин, Михаил Гаврилович Червинский сөз сөйлеп, алғыстарын білдірді.
Аталмыш шараға экспозицияланған «Ерлік – елге мұра, ұрпаққа ұран!» атты кітап көрмесі жасақталып, шолу жасалды. Көрме мұрағат құжаттары және «Жеңіс Даңқы» мұражайынан әкелінген экспонаттармен толықтырылды. Шараға кітаптың авторы Ахметова Лайла Сейсембекқызы, Ұлы Отан соғысының ардагерлері, БАҚ, қаламыздың мемлекеттік және қоғамдық ұйымдарының өкілдері, Электрондық, Радиотехника және байланыс колледждерінің студенттері қатысып, үлкен әсер алып қайтты.
Кеш соңында автор «1941. Брестская крепость. Казахстан» кітабының бірнеше данасын соғыс ардагерлеріне, біздің кітапхана қорына, ауыл кітапханаларына, мұражай және мұрағат қызметкерлері мен оқу орындарына тарту етті. Соғыс ардагерлері және еңбек ардагерлерінен құрылған халықтық хоры Жеңіс, Отан туралы әндерді орындап, келген қонақтарға жақсы көңіл күй сыйлады.
