«Ақын, аудармашы, ғалым Мұрат Сұлтанбеков – 80 жаста»: әдеби-поэтикалық кеш
25 қаңтар күні Шығыс Қазақстан облыстық Абай атындағы кітапханада Педагог, ғалым, аудармашы, филология ғылымдарының кандидаты, Қазақстан Жазушылар және Журналистер Одағының мүшесі, халықаралық «Аттила» медалінің иегері Мұрат Рақымжанұлы Сұлтанбековтің 80 жасқа толған мерейтойына орай «Ақын, аудармашы, ғалым Мұрат Сұлтанбеков – 80 жаста» атты тақырыпта қаламгермен әдеби-поэтикалық кездесу кеші өткізілді.
Кездесу барысында қаламгердің ұшқыр қаламынан әр жылдары жарық көрген бай шығармашылық мұрасы жайында, Абай, Шәкәрім шығармаларынан аударған аудармалары және ғалымның әдебиеттану ғылымына қосқан үлесі жайында кеңінен әңгімеленіп, бірге қызмет жасаған әдебиет саласында жүрген үзеңгілес достары қаламгер өмірі жайында өз ойларын ортаға салды.
Орыс әдебиеті кафедрасының доценті, филология ғылымының кандидаты, Мұрат ағамыздың әріптесі Демежанов Төлеубек Мұхамедиұлы, абайтанушы ғалым Асан Омаров қаламгер жайында естеліктерімен бөлісіп, абайтанушы, халық композиторы Арғынбек Ахметжанов өзінің жыр жолдарын арнады.
Кеш барысында Ә. Қашаубаев атындағы филармония әншісі Түктібаев Бақытжанның орындауында М. Ержановтың «Сайра бұлбұл», Ф. Оңғарсынованың сөзіне жазылған «Туған күн» әні шырқалды. М. Төлебаев атындағы музыкалық колледждің студенттері Ұлықбеков Арсеннің орындауында Мағауия Хамзиннің «Жайлау», «Баламишка» күйлері және Низан Абылайханның орындауында Т. Рахимовтың «Әз Жәнібек – Керей хан» әні орындалды.
Көпсалалы колледждің студенттері Омарова Айдана мен Тыныбаева Арманай ақын өлеңдерінен үзінділер оқыды.
Жазушы мерейтойына арнап кең көлемді «Ақын, аудармашы, ғалым М. Сұлтанбеков – 80 жаста» атты тақырыпта кітап көрмесі ұйымдастырылып, ақынның өмірінен сыр шертетін суреттері қойылды.
