Рухани жаңғыру: Latyn – құнды мұра: кең көлемді ретро-көрме

  • 26.02.2018

26 ақпан күні «Рухани жаңғыру» бағдарламасы аясында Шығыс Қазақстан облыстық мәдениет, архивтер және құжаттама басқармасының бастамасымен Семей қаласындағы заманында Абай Құнанбайұлы оқырманы болған тарихи кітапхана облыстық Абай атындағы әмбебап кітапханасы сирек басылымдарының алтын қорымен шалғайдағы оқырмандар қауымын таныстыруға Зайсан ауданына іс-сапарға шықты. Бүгінгі таңда өзекті мәселе болып отырған латын әліпбиі Елбасының «Болашаққа бағдар: рухани жаңғыру» мақаласында көрініс тауып, мақсаты айқындалып, халықтың назарына ұсынылды.
Облыстық кітапхана қызметкерлері сирек қорында күні бүгінге дейін сақталып келген 1929-1940 жылдары латын қарпімен қазақ тілінде жарық көрген басылымдарды таныстыру мақсатында Зайсан ауданына қарасты Дайыр және Қаратал елді мекендерінде болып, ауыл тұрғындарымен кездесті. Кітапхана мамандары ауыл тұрғындарына еліміздегі өзекті мәселе болып отырған латын қарпіне көшудің маңыздылығы жайлы ақпарат беріп, қорындағы латын қарпінде баспа көрген сирек басылымдардан жасақталған «Рухани жаңғыру: Latyn-құнды мұра»- тақырыбында сирек кітаптар көрмесін ұсынды.
Кең көлемді ретро-көрмеден орын алған басылымдар әр түрлі ғылым салаларынан 11 бөлімге топтастырылып қойылып, қатысушыларға таныстырылды.
Латын қарпіндегі сирек кітаптар көрмесінен жоғарыда аталған ғылымның барлық саласынан қазақ елінің сол тарихи кезеңдегі қоғамдық-саяси, әлеуметтік өмірінен ақпарат беретін ұлт зиялыларының зерттеулері, ғылыми еңбектері қойылды. Ғылым салаларындағы әдебиеттер Қ.Басымұлының, Қ.Жұбановтың, Т.Шонановтың, Ұ.Құлымбетовтың, Т.Арыстанбековтың, А.Маметовтың, А.Сейітовтың, Ә.Ермековтың, Х.Есенбайұлының, М.Әуезовтың еңбектерімен көрініс тапты.
Көркем әдебиет Абай Құнанбайұлының 1936 жылы Р.Жаманқұловтың редакторлығымен баспа көрген «Таңдамалы өлеңдерімен» басталып, Қ.Әбдіқадыровтың «Сатпаев», «Салмақпай» деген бүркеншік есімімен жариялаған Ж.Сәрсековтың «Тоқсаны» (1936), С.Сейфуллиннің «Қызыл ат» (1934) поэмасы, С.Мұқановтың «Ақ аю» (1935), Д.Әлімбаевтың «Толғау» (1941), Еркімбеков Дүйсенбектің «Шымыр» (1939), Қ.Аманжоловтың “Өмір сыры” (1938), Ә.Әбішевтің «Армансыздар», (1938), Қ.Тайшықұлының «Октябрь ұшқыны» (1935), М.Дәулетбайұлының «Қызылжар»(1935), «Қазақ ақындарының өлеңдері» (1937) жинағы сынды әдебиеттерден тұрады. Бейімбет Майлиннің «Азамат Азаматыч» (1934) романы мен «Романовтардың соңғы күндері» (1932) – атты П.М.Быковтан аудармасы жатады. І.Жансүгіровтің Таңқыбай деген бүркеншік есіммен жазған «Құқ» фельетондар жинағы, Сәкен Сейфуллиннің «Қызыл ат» (1934) поэмасы көркем әдебиетімізді толықтырды.

Көрмеге: 1. Комсомол пропагандисі 1940. №2. 3-4 9, 10. 2. Әдебиет майданы 1937 №4
Газеттер: 1. Екпінді Алтай 1939, 2. Социалистік майдан 1939, атты мерзімді басылымдармен танысты.
Сонымен қатар кітапхана қызметкерлері ауыл тұрғындарына өздерінің смартфондарына немесе планшеттеріне жүктеу үшін латын әліпбиіндегі 13 кітапттан тұратын электрондық QR-кітап сөресін ұсынды.
Аталған шара Сарытерек ауылы мен Зайсан қаласында жалғасын тауып, тұрғындарға таныстырылады.