Шәкәрім туралы статистикалық ақпарат сирек басылымда: бір кітап көрмесі
19 шілде күні ойшыл-философ Шәкәрім Құдайбердіұлының туғанына 160 жылдығына орай кітапханамыздың «Коворкинг» орталығында «Шәкәрім туралы статистикалық ақпарат сирек басылымда» тақырыбында бір кітап көрмесі өтті.
«Сельско-хозяйственный обзор Семипалатинкой области за 1914 год» тарихи басылымында өлке материалдарын жан-жақты жинастырумен шұғылданған бірден-бір мәдени және ғылыми-зерттеу мекемесі – Статистикалық комитеттің ұйымдастыруымен Павлодар, Қарқаралы, Семей, Өскемен, Зайсан өлкелеріне барып ауылдардың ауыл шаруашылық өмірі туралы сұрақ-жауап жазып әкелген 390 ерікті тілшілердің жазбалары арқылы мәліметтер жинақталған. Кітапта 1914 жылдың 1 сәуір – 1 қазан аралығындағы Шәкәрім бабамыз тұрған Шыңғыстау болыстығының жай-күйін баяндайтын статистикалық мәліметтер де берілген. Болыстықтағы қыстаулар саны, шаруашылық саны, адамдар саны, мал-төл саны, құдық саны, ішетін судың сапасы, жұмысқа қабілетті адамдар қанша т.б. деректер туралы толық мәліметтер қамтылады. 1915 жылы шыққан кітап Семейдегі «П.Плещеев и К» баспасынан жарық көрген. Кітаптың зертеуші-ғалымдар, өлкетанушылар үшін берер мағлұматы құнды болмақ. Қатысушылар Шәкәрім Құдайбердіұлына арналған кітап көрмесімен жақынырақ танысып, өте қызықты мағлұмат естігендеріне ризашылықтарын білдірді.
