Өнердің қайталанбас өр тұлғасы: шығармашылық сағат
27 наурызда «Өнер өлкесінде» сазды қонақжай клубы аясында қазақтың маңдайына біткен біртуар ұлы, дарынды композитор, ҚР еңбек сіңірген өнер қайраткері Теміржан Базарбаевтың туғанына – 80 жыл толуына орай еске алу мақсатында және кітап қорымыздағы сазгердің шығармаларын, жарық көрген кітаптары мен ол кісі жайында жазылған естеліктер мен мақалаларды оқырмандарға жақынырақ таныстыруда шығармашылық сағат өтті.
1961 жылдан бастап өмірінің соңына дейін Семейдің Мұқан Төлебаев атындағы саз колледжінде 45 жылдан астам уақыт ұстаздық қызмет еткен, шәкірт тәрбиелеп, миллиондаған жүректерді әсем әнмен жаулаған Теміржан Базарбаев – арнайы білімді, теориялық сауатты, әлемдік музыкадан мол хабары бар өнер иесі.
Абай мен Шәкәрімнің музыка мұрасын зерттеуші ғалым. Қазақтың 150-ге жуық ән-күйлерін жинап нотаға түсірген фольклорист. Ұзын саны 200-ге жуық ән шығарған Теміржан Базарбаевтың әндерінің ішінде ел ішіне кең тараған “Тамаша”, “Аулым “, “Қаздар қайтқанда”, “Өз елім” сынды әндері өткен ғасырда дүниеге келген қайталанбас туындылар.
Теміржан Базарбаев есімі аталғанда ойыңа алдымен “Ауылым” әнінің оралатыны бар. Қаншама уақыт өткенімен бұл әндердің барлығы жұрт аузында.
Іс-шараға қатысушы Шәкәрім атындағы университетінің білім алушы жастары “Ауылым” әнін бірлесіп шырқап берді. «Қаздар қайтқанда» әнінің бейне түсірілмі назарға ұсынылды. Бөлім қызметкерлері «Сан қырлы сазгер» кітап көрмесіне шолу жасап, буклеттер таратты.