Ядролық қарусыз-бейбітшілік әлемге: кең көлемді кітап көрмесі
Осыдан 25 жыл бұрын әлем қауіпсіздігі үшін ең маңызды қадам жасалды. 1991 жылдың тамызында мемлекет басшысы Нұрсұлтан Назарбаев Семей ядролық полигонын жауып, жаһан жұртын алапат қасіреттен құтқарды. Биыл – ел Тәуелсіздігіне 25 жыл. Тәуелсіздік сол Семей полигонын жабудан басталды.
29 тамыз күні «Бейбітшілік» алаңында Семей ядролық полигонының жабылғанына 25-жыл толуына орай ұйымдастырылған «Бейбітшілік» акциясына Абай атындағы кітапхана «Ядролық қарусыз – бейбітшілік әлемге» атты кітап көрмесімен қатысты. Семей ядролық сынақ полигонының тарихы, апат салдары, сынақ полигонының жабылуы туралы толық ақпарат беру мақсатында ұйымдастырылған кітап көрмесіне шолу жүргізіліп, шетелдік қонақтар мен қатысушыларға мол ақпарат берілді.
Көрмені Жапония елінен келген Токио университетінің профессоры, халықаралық мекемелердің өкілдері көріп танысты. Халқымызға орны толмас қайғы әкелген, ядролық жарылыстар алаңына айналған Семей полигоны туралы терең мағлұматтар беретін жазушылар мен қоғам қайраткерлерінің ғылыми еңбектері мен басылымдар беттерінде жарық көрген мақалалар қатысушылардың басты назарында болды.
«Семей-Невада» антиядролық қозғалыстың вице-президенті С.О.Картоевтың жеке архивінен алынып, көрмеден орын алған фотосуреттер мен Семей полигонының мерейтойлық медельдары және жергілікті жазушы М.Сәрсекенің «Семей қасіреті» атты соңғы кітабы көпшілік қауымның қызығушылығын тудырды.
