Жеке компьютер меңгеру курсы
2016 жылғы 24 қараша мен 7 желтоқсан аралығында азаматтық авиация ұшқышы Марат Зейкенұлы Қадырбековқа «Жеке компьютер меңгеру курсы» өткізілді. Пайдаланушының жұмысына байланысты және оның сұранысы бойынша біз өз жұмысымыздың кестесін оған лайықты қылып жөндеп, курс бағдарламасын қысқа мерзімде компьютерде өздігінен жұмыс жасауға қажетті дағдыларды меңгеруге бағыттап жасақтадық. Нәтижесінде Марат Зейкенұлы аз уақыт ішінде компьютерлік техниканы еркін пайдалану дағдысын қалыптастырып, Интернет желілері мен электронды поштаны қолдануды үйреніп алды. Өзінің ұлына жазған алғашқы электронды хатына жауап алған кезде, Марат Зейкенұлы кітапхана туралы пікір қалдыруды жөн көрді.
Марат Қадырбеков, қызметте жүрген зейнеткер: «Кітапханада ұйымдастырылған компьютерді меңгеру курстарының арқасында мен файлдармен, құжаттармен жұмыс жасауды, Microsoft Word бағдарламасында мәтіндерді теруді үйрендім. Мұндай дағдылар менің кәсіби қызметімде таптырмас көмек болды. Ал ең бастысы маған Интернет желісіндегі жұмыс қатты ұнады. Әлия Жүнісбекқызы – тәжірибесі мол тәлімгер, жаңадан үйреніп жүрген азаматтарға қиын тақырыптарды түсінікті, әрі жеңіл түсіндіреді. Алдағы уақытта басқа да компьютерлік бағдарламаларды үйрену үшін осы кісінің көмегіне жүгінемін деген сенімдемін. Кітапханада ұйымдастырылатын білім беру курстарының тегін болуы бүгінгі таңда қарапайым халық үшін өте маңызды шара екенін айтқым келеді».
