Ақындық мектепті дамытқан суреткер: кітап көрмесі

2017 жылы 13 шілде күні Абай кітапханасы оқырмандарға қызмет көрсету бөлімінің қызметкерлері қазақтың біртуар ұлдарының бірі, ақын – Дулат Бабатайұлының туғанына 215 жыл толуына орай «Ақындық мектепті дамытқан суреткер» тақырыбында кең көлемді кітап көрмесін жасақтап, кітапхана пайдаланушыларына арнап аталмыш көрмеге шолу өткізді. Шолу барысында өлеңдері ел ішінде көп таралған Дулат ақынның кір жуып, кіндік кескен жері Шығыс Қазақстан облысы, Аякөз ауданы, Сандықтас елді мекені, тегі – орта жүз Найман, Сыбан елінен болғандығы туралы айтылып, шығармалары дидактикалық негізде жазылып, сол кездің әлеуметтік қоғамдық замана жайында толғаған ақын екендігі туралы ақпарат берілді. Әйтсе де, ақын өмірі толық зерттелмеген. Біршама өлеңдері жинақталып Қазан қаласында 1880 жылы алғаш рет «Өсиетнама» деген атпен кітап болып жарыққа шыққан. Жинаққа ақынның сол кезеңдегі қазақ елінің саяси-әлеуметтік өмірін шыншылдықпен жырлаған ой-толғаныстары енген. Дулаттың өлең-жырларының басты сарыны – 19 ғасырдың алғашқы жартысындағы отаршылдық әрекеттерге рухани қарсылық көрсету. Ақын “Тегімді менің сұрасаң”, “О, Сарыарқа, Сарыарқа”, “Асқар таудың сәні жоқ”, т.б. жырлары мен жеке кісілерге айтқан. Аталмыш көрмеге Дулат Бабатайұлының «Осындай заман кез болды..», «Кеудем – ақыл сарайы», «Нар заман мен зар заман» поэзиясы, «Ақындар аманаты. Қазақтың ауызша әдебиеті» және т.б. кітапхана қорындағы кітаптары қойылып, мерзімді басылым беттеріндегі мақалалармен толықтырылды. Кітапхана пайдаланушыларына кітапхана сайтындағы http://babataiuly.hop.ru// «Дулат Бабатайұлы: ақын, сатирик» атты виртуальды көрме жайында да айтылып, көрменің 10 бөлімімен танысты. Шара соңында көрмеге қатысушылар кітапхана сайтындағы виртуальды көрме жайында пікірлерін ортаға салып, кітапхана сайтынан әртүрлі таптырмас кажетті ақпарат алып жүргендіктерін жеткізіп, кітапхана жұмысына сәттілік тіледі.