Танымал қазақ математигі: өлкетану оқуы
2013 жылдың 20 ақпанында Шығыс Қазақстан облыстық Абай атындағы әмбебап кітапханасы Р.Байсейітов атындағы қаржы-экономикалық колледжінің студенттерімен «Танымал қазақ математигі» өлкетану оқуын өткізді.
Өткізілген күні: 2013 жылдың 20 ақпаны. Өткізілген орны: Р.Байсейітов атындағы қаржы-экономикалық колледжі. Қатысушылар колледж студенттері. Қатысушылар саны: 27 адам. Шараның мақсаты: Семей өңірінің мақтанышы, танымал математик ғалым, тәлімгер басшы Төлеубай Амановтың өмір жолымен, еңбектерімен, ол туралы жазылған басылымдармен, әдебиеттермен таныстыру. Күтілетін нәтиже: жастардың өз жерінің әйгілі адамдарын тануына ықпал етуде тағылымды-танымдық ақпараттар арқылы оқып білуге деген қызығушылығына ықпал ету.
2013 жылдың 20 ақпанында Шығыс Қазақстан облыстық Абай атындағы әмбебап кітапханасы Р.Байсейітов атындағы қаржы-экономикалық колледжінің студенттерімен «Танымал қазақ математигі» өлкетану оқуын өткізді. 2013 жылдың 25 тамызында Төлеубай Амановтың туғанына 90 жыл толуына орай, «Семей өңірінің тарихи тұлғалары» сериясы бойынша өткізілген кезекті шараның тақырыбы ғалымға арналды. Математика ғылымында «Аманов теориясы» деген атпен үлкен ғылыми жаңалық ашып өшпес мұра қалдырған ғалымның ғылыми-зерттеу еңбектері жайында айтылған танымдық шараның жастарға берер пайдасы зор екені белгілі. Абзал аға болашақ ғылымға барар білім жолын қаладағы №16 мектептен алған екен. Математик ғалымның өмір жолынан деректер беретін слайд кітапхана қорындағы басылымдардан басқа өзі оқыған, бүгінгі таңда Т.Аманов атындағы №16 мектептің мұражайынан алынған ғалымның қолжазбаларымен, отбасылық суреттерімен, диплом көшірмелерімен толығып шараның шырайын аша түсті. Әдебиеттен, поэзиядан, тарихтан да таным-түсінігі мол жан-жақты азамат Төлеубай Ыдырысұлының өнегелі тәрбиесін көріп, танып өскен кешегі студент, бүгінгі әдебиеттанушы ғалым Мұрат Сұлтанбеков те шараға қатысып, «жақсының жақсылығын айтуды» өзінің адами борышы санап, дана тұлға туралы естеліктерімен бөлісті. «Т.Ы.Амановтың туғанына 90 жыл» атты кітап көрмесі ұйымдастырылып, кітапхана қорынан және мұражайдан алынған 14 басылым қатысушылардың назарына ұсынылды. Жастарға Абай атындағы кітапханасы құрастырған Т.Амановтың қысқаша өмірдерегін баяндайтын бетбелгілер таратылып үлестірілді. Колледж кітапханасына Ө.Сұлтановтың «Мұхтар Әуезов және спорт өнері» кітабы сыйға тартылды. Шара соңынан колледж кітапханашысы Қ.Мылтықбаева сөз алып, жерлесіміз Төлеубай Ыдырысұлының тамаша өнегелі өмірімен хабардар болғандарына, пайдалы ақпарат алғандырына шынайы ықыласын білдірді.