Қазақты әлемге танытқан заңғар жазушы: әдеби бейнекөпірі
Өткізілген күні: 2013 жылдың 22 мамыры. Өткізілген орны: Шығыс Қазақстан облыстық Абай атындағы әмбебап кітапханасы. Қатысушылар: қаланың зиялы өкілдері: өлкетанушылар, жазушылар, ғалым-ұстаздар және кітапханашылар қауымы.
Өткізілген күні: 2013 жылдың 22 мамыры. Өткізілген орны: Шығыс Қазақстан облыстық Абай атындағы әмбебап кітапханасы. Қатысушылар: қаланың зиялы өкілдері: өлкетанушылар, жазушылар, ғалым-ұстаздар және кітапханашылар қауымы. Қатысушылар саны: 26 адам. Шараның мақсаты – қостанайлық оқырмандарды жазушы М.Әуезовтің Семейдегі өмірлік, шығармашылық жолы, адамгершілік адами тұлғасы, қазақ әдебиетіндегі ролі және кітапхана қорында сақталған әдебиеттермен таныстыру. Күтілетін нәтиже: Абай атындағы әмбебап кітапхананың сирек қорындағы деректерді өздерінің шығармашылықтарына пайдалануын қамтамасыз ету, М.Әуезовті көзі көрген және шығармашылығын зерттеп жүрген өлкетанушылармен, жазушылармен, ғалымдармен таныстырып, қашықтағы қостанайлық тыңдармен қауымның танымдық деңгейін кеңейту, Шығыс Қазақстан, Қостанай облыстары арасындағы әдеби байланыстарды нығайтуды жүзеге асыру.
Шығыс Қазақстан облыстық Абай атындағы әмбебап кітапханасы 2013 жылдың 22 мамырында Л.Н.Толстой атындағы Қостанай облыстық әмбебап кітапханасымен тұңғыш рет әдеби бейнекөпір өткізді. Қостанайлық әріптестер мен оқырман қауым М.Әуезовтың жерлестерімен жүздесіп, жазышының өмірі мен қоғамдық қызметі, шығармашылығы туралы мол мағлұматтарға қанық болды.
Аса құнды еңбектері үшін халық құрметіне бөленген, қазақтың ардақты азаматы, құдіретті талант иесі Әуезовтің туған жеріндегі зиялы қауым өкілдерін онлайн кездесуге шақырып, көне көз қариялардың жазушы туралы шежірелі ұлағатты сөздерін тыңдады. Қазақ халқының бағына туған жазушының кісілік кескін-келбеті, сабырлылықпен асықпай сөйлеген өнегелі сөздерін тыңдап, суретке түскенін жыр етіп әдемі әңгімелеп берген аға буын: Бекен Исабаев, Бекен Жұманов, Қапура Мырзақасымованың, Шәкәрім-Мұхтар, Әуезов–Сәтбаев жарастығы туралы естеліктері қостанайлық оқырмандар үшін қызықты да маңызды ақпарат болды. Жазушылар Медеу Сәрсеке мен Төкен Ибрагимов Әуезовтің Семейдегі алғашқы қызметі жайында, «Шәкәрім» атындағы СМУ-нің профессоры Арап Еспенбетов, қазақ спортының дамуына қосқан жазушының үлесі туралы «Шәкәрім» атындағы СМУ-нің ғалымы Өмірзақ Сұлтанов шығармалары туралы, М.Әуезов есімімен аталатын педколледж туралы Абайдың жиені Балтабек Ерсалимовтің айтқан жарқын да нәрлі әңгімелеріне қостанайлық қатысушылар: ақындар, жазушылар, кітапханашылар, студенттер дән риза болды.
Шара барысында М.Әуезовке қатысты кітапхананың сирек басылымдар қорындағы 1945-1960 жылдар аралығында қазақ әдебиетінің классик ақыны Абай Құнанбаев туралы жазылған алғашқы шығармалары көрсетіліп, шолу жасалды.
Шығыс Қазақстан облыстық Абай атындағы әмбебап кітапханасы мен Л.Н.Толстой атындағы Қостанай облыстық әмбебап кітапханаларының ұйымдастыруымен «Қазақты әлемге танытқан заңғар жазушы» атты әдеби бейнекөпір жоғары деңгейде өтіп, заңғар жазушы туралы сыр-сұхбат ала алған қостанайлықтар алдағы уақытта тағы да осындай әдемі кездесулер болса деген тілектерін жеткізе келе, айтыскер ақын Орманшина Әлфияның Семей туралы жыр шашуымен аяқтады.