Ұлт зиялыларының мұралары латын қарпінде: сирек кітаптар көрмесі
Кітапхана қызметкерлері қаламыздағы Қазақстан инновациялық университетінде өткен «Латын әліпбиіне көшу – өркениетке қадам» атты семинарға «Ұлт зиялыларының мұралары латын қарпінде» атты сирек кітаптар көрмесімен қатысты. Семинар қатысушыларын, яғни бүгінгі таңда білім алып жатқан жас буын өкілдерін «Рухани жаңғыру» мемлекеттік бағдарламасы аясында қоғамымыз көшкелі отырған латын әліпбиі жайлы ақпаратпен таныстырып, еліміздің 1929-1940 жж. даму кезеңін қамтыған латын қарпінде жарық көрген сирек қор әдебиеттерінің көрмесі ұсынылды. 135 жылдық тарихы бар кітапханамыздың сирек басылымдарының алтын қорындағы ұлт зиялыларының төл туындылары жас буын өкілдерінің назарын тартты. Қазақ елінің тәуелсіздігі үшін жандарын қиған ұлт зиялыларының өмірімен, шығармашылығымен өрілген сирек кітаптарға жасалған шолу семинар қатысушыларына үлкен ой тастады. Шараға қатысушы қаламыздың жоғары оқу орындары ұстаздары алған ақпараттарына ризалық білдіріп, студент жастарға біздің кітапхана сирек қорынан ұлт зиялылары шығармаларын ғылыми жоба негізінде зерттеуге ұсыныс білдірді. Тарих толқынында болған, өз ұлтының жарқын болашағы үшін күрескен ұлт зиялыларының жанкештілігі, ұлтын шексіз сүюі әрқашан жас буынға үлгі болуы керек. Жас буын өкілдеріне елін, жерін, халқын сүюге, өз Отанының патриоты болуға үлгі боларлық іс тындырған, аттары қазақ тарихында мәңгі сақталуға тиіс зиялыларымыздың шығармаларын Алаштың 100 жылдығына орай кітапхананың дайындаған «Алаш» электронды кітапханасымен сайтымыз арқылы қол жеткізуге болатыны жайлы ақпарат берілді.
Әсіресе, әйгілі 37-нің құрбандары С.Сейфуллин, Х.Есенбайұлы, І.Жансүгіров, Қ.Жұбанов, А.Сейітов, А.Маметов, Ұ.Құлымбетовтың, Т.Шонанұлы, Б.Майлин сынды ұлт зиялыларының көзі тірісінде баспа көрген шығармалары, авторларының ауыр тағдырлары жастар зердесіне ой салар сирек жәдігерлер болды.
Кітаптар көрмесі латын қарпіндегі «Әдебиет майданы», «Комсомол пропагандисі» журналдары мен «Социалистік майдан», «Екпінді Алтай» сияқты Шығыс Қазақстан облыстық аудандық газеттер тігінділерімен толықты.
QR – кодымен безендірілген тақтада Абай Құнанбайұлының 1936 жылы Р.Жаманқұловтың редакторлығымен баспа көрген «Таңдамалы өлеңдері», ұлт зиялылары, алаш арыстарының көзі тірісінде жария көрген өте сирек кездесетін басылымдары ұсынылды.
