Абай атындағы әмбебап кітапханаға – 130 жыл: бейнекөпірі
Шығыс Қазақстан облыстық Абай атындағы әмбебап кітапханада маусым айының 18 күні Семей-Қөкшетау облыстық кітапханалары арасында әріптестік бейнекөпір өткізілді.
Өткізілген күні: 2013 жылдың 18 маусымы. Өткізілген орны: Шығыс Қазақстан облыстық Абай атындағы әмбебап кітапханасы. Қатысушылар: Абай атындағы әмбебап кітапхана және орталық қалалық кітапханашылар қауымы. Қатысушылар саны: 25 адам. Шараның мақсаты: Абай оқыған тарихи кітапхананың 130 жылдық мерейтойы қарсаңында көкшетаулық әріптестерді кітапханамыздың кешегі және бүгінгі тыныс-тіршілігімен таныстыру. Күтілетін нәтиже: екі облыстық кітапханалар арасындағы кітапханалық шығармашылық байланысты дамыту.
Шығыс Қазақстан облыстық Абай атындағы әмбебап кітапханада маусым айының 18 күні Семей-Қөкшетау облыстық кітапханалары арасында әріптестік бейнекөпір өткізілді. 2013 жылы қазан айының 3-жұлдызында 130 жыл толғалы отырған Абай атындағы әмбебап кітапхананың мерейтой қарсаңында қашықтан байланысу арқылы екі облыстық кітапханалар арасында тәжірибе алмасу бағытында бейнекөпір өтті. Абай, Шәкәрім, Мұхтар сынды қазақтың ардақты азаматтары дүниеге келген киелі Семей жерінде орналасқан тарихи кітапхананың кітап қоры рухани байлыққа толы құнды дүниелерге аса бай кітапхана және Қазақстан кітапханаларының ішіндегі көне кітапханалардың бірі. Абай атындағы кітапхананың директоры А.Ә.Шаймарданованың құттықтау сөзінен кейін бейнекөпір жалғасын тапты. Абай атамыз кезінде ат арылтып сонау Шыңғыстаудан кітап алу үшін қалаға келіп қатынап отыратын тарихи кітапхананың қоры сол заманда-ақ құнды дүниелерге мол болған екен. Сібірге жер аударылған Е.П.Михаэлис бастаған социал-демократтардың жинауымен қорланған батыс, орыс, шығыс, қазақ ойшылдарының інжу-маржандары қаншама адамдардың игілігіне қызмет етті. Өлкетану сирек басылымдар туралы берілген құнды ақпараттарға қатысушы көкшетаулық әріптестер қызығушылығын білдірді. Кітапхана беделін көтерудегі жаңа әдістер, ИРБИС бағдарламасы арқылы жүргізіліп жатқан кеңейтілген библиографиялық жазулардың корпорациялық бірлесу жұмысы, көпшілік жұмыстардағы жаңашылдық, кітапхананың ақпараттық-библиографиялық қызметі туралы тыңдалды.
Көкшетаулық әріптестер де өздерінде қызу жүріп жатқан заманауи тіршіліктерімен таныстырып екі жақты көкейтесті мәселелер жайында сөз қозғалды.
Заман ағысынан қалыспай қызмет көрсетудің дәстүрлі түрімен қатар қазіргі озық әдіс-тәсілдерін қолдана отырып, оқырмандарын адамгершілік тәрбиесіне бағыттап, әлемдік компьютерлер нарығында аянбай еңбек етіп жатқан Семейдегі қарт кітапхана – Абай атындағы әмбебап кітапхана ұжымының кешегі және бүгінгі тыныс-тіршіліген хабардар болған М.Жұмабаев атындағы Ақмола облыстық әмбебап ғылыми кітапхана арасындағы виртуалды достық, әріптестік кездесулер бейнекөпірі өз мәресіне жетті. Сөз соңында Ақмола облыстық әмбебап ғылыми кітапхана директоры, ақын А.Бердалин семейліктерге жыр шашуын арнай келе, біздің кітапхананың бай сирек басылым қорымен өз елінің жұртшылығын таныстырып қайтуға шақырды.
Абай кітапханасының 130 жылдығына орай ғаламтор арқылы өткен екі облыс кітапханашыларының мұндай пікірлесу, жүздесулері болашақта өз жалғасын табатынын айғақтайды.