Шұғылалы әуендер: көрме

Қазақстан түрлі ұлттардың басын қосқан ұлы мекен. Олардың салт-дәстүрлері, тілі мен мәдениеті жоғалмас үшін үкімет тарапынан қолайлы жағдай жасалған. Жыл сайын 1 мамыр – Қазақстан халықтарының бірлігі күні аталып өтіледі. Аталмыш мереке қарсаңында 25 сәуір күні Абай кітапханасында «Шұғылалы әуендер» атты кітап көрмесі ұйымдастырылды.

«Қазақстан – бірлік пен татулықтың мекені» қағидасын ұстанған ел үшін бұл мейрамның орны ерекше. Жыл сайын атаулы мерекеде Қазақстан аумағында тұрып жатқан 150-ге жуық ұлт пен ұлыс өкілдері киелі қара шаңырақта тату-тәтті өмір сүріп жатқандығын тойлап, жер-жерлерде түрлі мәдени іс-шаралар өткізіледі. Бүгін де кітапханамыздың қызметкерлері үш бөлімнен жасақталған кең көлемді кітап көрмесіне шолу жасады. «Ынтымақ – бірлік кепілі» атты бірінші бөлімі қазақ жерінде тұрып жатқан түрлі халықтардың салт-дәстүрімен таныстырады. Көп ұлтты Қазақстан халқының бейбіт өмірін сомдайтын, тарихын қамтитын, бірлігін бейнелейтін «Народы Казахстана» – Энциклопедический справочник , «Мудрость Востока», Кан Г. «Корейцы Казахстана» және өзге де басылымдар оқырмандарды ерекше қызықтырды.

Көрменің «Әлем халықтарының дастарханы» атты екінші бөлімінде елімізді мекендеген этнос өкілдерінің дәстүрлі тағамдарының тарихы, дайындау әдістері сипатталған әдебиеттер мен газет-журналдар ұсынылады. Олардың ішінде «Грузинская, армянская, азербайджанская, узбекская кухня», «Culinaria», «Рецепты русской кухни» кітаптары сұранысқа ие болды.

«Әдебиет әлемі» атты үшінші бөлімде оқырмандар назарына қазақ және өзге ұлт өкілдерінің танымал ақын, жазушыларының шығармалары, түрлі ұлттың поэзия әлемі және шет тіліндегі аудармалары ұсынылды. Бұл бөлімде Ilyas Esenberlin «The Nomads», А.Ивановтың «Вечный зов», Г.Бельгер «Избранное», Б. Щербаков «Звездная степь Жидебая», Б. Канапьянов «Кочевая звезда» сынды кітаптар қатысушылар тарапынан ерекше қызығушылық тудырды.

Шара соңында қатысушыларға «Қазақстан халықтарының салт-дәстүрлерін білесің бе?» деген тақырыпта шағын викториналық ойын ұсынылды.