Ғасырлармен үндескен асыл қазына: жылжымалы әдеби экспозиция
27 тамыз күні кітапхана қызметкерлері қалалық мәдениет Үйінде Семей қаласының зағип және нашар көретін азаматтарға арналған арнайы кітапхананың 50 жылдық мерейтойы арналған шараға қатысушы қонақтарға заманында Абай оқыған сирек басылымдармен және «Абай әлемі» жобасы аясында жарық көрген жаңа әдебиеттер әлемімен таныстыру мақсатында «Ғасырлармен үндескен асыл қазына» атты жылжымалы әдеби экспозициясын жасақтады.
Шара барысында қонақтар көрменің «Абай таныған кәусарлар» бөлімінен қоғамдық кітапхана сөрелерінен Абай оқып танысқан батыс ойшылдарының еңбектері, көңіліне жақын тұтып оқыған Л.Толстой, В.Жуковский, А.Пушкин, И.Крыловтай орыс классиктері, М.Лермонтовтың аудармалары арқылы Абай танысқан У.Шекспир, Ф.Шиллер, И.Гете, Дж.Байрон, Г.Андерсен сияқты батыс Еуропа классиктері шығармаларының үздік үлгілері мен 19 ғасырда Ресейде жарық көрген мерзімді басылымдар, анықтамалықтармен танысты.
Көрмеге келушілер үшін «Абай тұлғасы сирек басылымдарда» бөлімдерінде тосын сый – Абай заманындағы басылымдардағы ғұлама ақын тұлғасына қатысты аса сирек кездесетін өлкетану дереккөздері-түпнұсқалармен қауышу болмақ.
Көрмеден Абай Құнанбайұлының, Рақымжан Жаманқұлов пен Ықылас Адамбековтың редакторлығымен 1936 және 1939 жылдары баспа көрген латын қарпіндегі «Таңдамалы» өлеңдері мен Елбасының «Рухани жаңғыру бағдарламасы» аясында ШҚО әкімі Даниял Ахметовтың қолдауымен жүзеге асырылған «Абай әлемі» жобасы бойынша жарық көрген өңір авторларының шығармалары орын алады.
Кітап көрмесі Абайдың жеке өмірі мен шығармашылығына қатысты фотосуреттермен және өлке зерттеушілерінің портреттерімен толықтырылды. Шара қонақтарына көне кітапхананың тарихынан, сирек басылымдар қорынан мол мағлұмат беретін, куар-кодталған шығармаларды мобильді қосымшаға жүктеу мүмкіндігі бар үлестірме материалдар таратылды.
Шара соңында көрмеге келушілер сирек кездесетін кітаптардың, оған енгізілген QR-кодтарының арқасында смартфон арқылы қалың оқырмандарға қол жетімді болатындығына ризашылықтарын білдірді.
