Семей полигоны – ұлт қасіреті: кең көлемді экспозициялық кітап көрмесі

Абай атындағы кітапхана қызметкерлері Семей мемлекеттік медицина институтында 28 тамыз күні «Невада-Семей» антиядролық қозғалысына 30 жыл толуына орай өткізілген Халықаралық форумға қатысушыларға «Семей полигоны – ұлт қасіреті» тақырыбындағы кең көлемді экспозициялық кітап көрмесін ұйымдастырды.

Шара барысында халқымызға орны толмас қайғы әкелген, ядролық жарылыстар алаңына айналған Семей полигоны туралы терең мағлұматтар беретін жазушылар мен қоғам қайраткерлерінің ғылыми еңбектері мен басылымдар беттерінде жарық көрген мақалалар,  Курчатов қаласында орналасқан «Ұлттық ядролық орталықтың» қазақ, орыс, ағылшын тілдерінде басылып шыққан әр жылдардағы зерттеу жұмыстары  қатысушылардың  назарына ұсынылды. Кітапханашы  форум қонақтарын «Невада-Семей» антиядролық қозғалысының маңызымен, М.С.Сәрсекенің, Н.Назарбаевтың, К.Бозтаевтың,  Н.Жотабаевтың, С.Картоевтың, С.Стивенсонның, И.Часниковтың, В.Шмидттің, Е.Якубовскаяның және т.б. авторлардың кітаптарымен, мерзімді басылым беттерінде жарияланған полигон зардабынан екі қолсыз туған  суретші Кәріпбек Күйікұлы туралы мақалалармен  таныстырып , Семей ядролық сынақ полигонының тарихы, апат салдары, сынақ полигонының жабылуы туралы шолу жасады. Семей қаласының тұрғыны суретші-флорист, мүсінші, қолөнер шебері Құрман Абайұлы Аймұханбетовтың «Құбыжық адам», «Ананың көз жасы», «Хайуан адам», «Полигонның зардабы», «15 жасар кемтар бала», «Өлім әкелген саңырауқұлақ», «Махаббат өлімнен де күшті» туындыларымен туындау себебімен танысқан қонақтар шебер туындыларына байланысты сұрақтарын қойды.

Көрме Семей мемлекеттік медицина институтының музейінде 28-29 тамыз күндері форумға қатысушылардың назарына ұсынылады.