Кітап – білім бұлағы: кітап көрмесі

1 қыркүйек – бірінші қоңырау мерекесі, бұл мектеп табалдырығын алғаш аттаған балалар үшін көптен күткен күн. Осы Білім күнін мерекелеу аясында Абай атындағы кітапхананың балалар әдебиеті бөлімінің қызметкерлері №16 жалпы білім беретін орта мектепте бірінші сынып оқушылары мен олардың ата-аналарына арналған көрме-шолу ұйымдастырды.

Мектеп залына жиналған жас балдырғандарды кітапхананың балалар әдебиеттері бөліміндегі балдырғандарға арналған кең көлемді кітап көрмесі қарсы алды. Көрмеде мектеп бағдарламасына көмек ретінде кітаптар, жарқын, танымдық энциклопедиялар, оқушыларға арналған анықтамалықтар, көркем әдебиет, сондай-ақ қазақ, орыс және шетел әдебиетінің танымал жазушыларының сүйікті ертегілері ұсынылды. Әсіресе, бірінші сынып оқушыларын кітап-панорамалары мен музыкалық кітаптар қызықтырды. Балалар “Көлік түрлері”, “Теңіз қарақшылары” және т. б. мазмұнды кітаптарға қызыға көңіл бөлді. Іс-шара соңында барлық қатысушыларға кітапхана жұмысының тәртібі мен жазылу ережелері туралы, балалар үйірмелерінің жұмысы туралы үлестірме материалдар таратылды. Қызықты кітап көрмесіне ұстаздар да қызығушылық танытып, өз оқушыларын кітап оқуға шақырды. Көрмеден орын алған әдемі де қызықты иллюстрациялы кітаптар барлық оқушылар мен ата-аналарға көтеріңкі көңіл-күй сыйлады.