Мен Тәуелсіз Қазақстанды бейнелеймін: сурет көрме-сайысы
11 желтоқсанда Қазақстан Республикасының Тәуелсіздік күнін мерекелеу аясында, балалар әдебиеті бөлімінің қызметкерлері жас жеткіншектердің бойына патриоттық сезімдерін қалыптастыру, шығармашылық шеберлікті дамыту мақсатында «Сиқырлы қылқалам» сурет үйірмесінің мүшелері мен кітапхананың жас қолданушылары арасында «Мен Тәуелсіз Қазақстанды бейнелеймін» тақырыбында сурет көрме-сайысын ұйымдастырды.
Сайысты жастарға рух беретін «Қазақстаным» әнімен бастаған №2 орта мектебінің 2»ә» сыныбының оқушысы Ерболов Ерәлі мен «Пригородная» орта мектебінің 10 сынып оқушысы жас әнші Крамаренко Вероника «Алтын бесік» әнін қазақ тілінде шырқап қатысушылардың қошеметіне бөлінді. Шара барысында қатысушыларға Тәуелсіз Қазақстан, ел бірлігі, төл мәдениетіміз бен ана тіліміз, мемлекеттік рәміздер туралы мағлұматтар ұсынылып, Тәуелсіз Қазақстанның құрылуы, әлеуметтік-саяси дамуы және ел Тәуелсіздігінің шежіресі туралы кітапхана қорынан алынған әдебиеттермен жасақталған кітап көрмесіне шолу жасалды.
Көрмеге «Сиқырлы қылқалам» сурет үйірмесі мүшелерінің, ата-анасының қамқорлығынсыз қалған балалар үйінің тәрбиеленушілерінің, сондай-ақ балалар әдебиеті бөлімінің жас пайдаланушыларының акварельді кескіндеме, сурет сияқты түрлі жанрдағы туған табиғатының сұлулығын, сүйікті қаласын, сәулет жетістіктерін, елорда астанасын бейнелейтін шығармалары қойылды.
Байқауға тәуелсіздік тақырыбын арқау еткен жас суретшілердің 37 жұмысы қабылданды, сайыс қорытындысы балдырғандардың жас мөлшеріне қарай бағаланды. Жасөспірімдер арасында бірінші орынды қала маңындағы «Пригородная» орта мектебінің 3«а» сынып оқушысы Қанағатов Бексұлтан, 2 – орын №22 орта мектебінің 2 «ә» сыныбының оқушысы Оразбек Гаухар, ал 3 орынды «РухСана» ұлттық академиясының тәрбиеленушісі Алжанов Аңсар иеленді. Жас суретшілердің туындыларына бағыт – бағдар, баға беруге арнайы суретші –мүсінші Асқар Райымбек пен суретші – дизайнер Архат Оразғалиевтар шақырылды. Байқау кезеңінде қойылған талаптарға сай жұмыстарымен оза шауып, жүлделі орын алғандар кітапхана әкімшілігінің мақтау грамоталары мен алғыс хаттарын атақты суретшілердің қолынан алып, ризашылықтарын білдірді. Жас суретшілерді марапаттау рәсіміне қатысқан ата-аналар, тәрбиешілер бала қиялына ерік беретін осындай байқаудың өткізілгеніне алғыстарын жеткізді, шара қазақ жүрегінің жырына айналған «Атамекен» әнімен аяқталды.
