«ХХІ ғасырдағы Абай және Қазақстан»: экспресс-мінбе
Абай атындағы кітапханада 23 қаңтар күні Президент Қ.Ж.Тоқаевтың «Абай және ХХІ ғасырдағы Қазақстан» мақаласын талқылау мақсатында қала кітапханашылары мен технологиялық колледждің студенттерінің қатысуымен экспресс-мінбе ұйымдастырылды.
Шараға Қазақ инновациялық-гуманитарлық заң университетінің философия ғылымдарының кандидаты, профессор Түйебаев Махмұт Мамырбекұлы шақырылып, Президет мақаласының негізгі идеяларын нақтылап, ел Президентінің «Абай және ХХІ ғасырдағы Қазақстан» мақаласының маңыздылығын түсіндірді.
Елбасы Н.Ә. Назарбаевтің «Болашаққа көзқарас: қоғамдық сананы жаңғырту», жалпы қоғамдық сананы жаңғыртудың маңыздылығы туралы мақаласы жайында айтып, Абай шығармашылығына және оның қоғамдық-саяси өмірдегі рөліне сүйене отырып, білім мен ғылымдағы міндеттер, ана тілінің дамуы мен танымалдығы жайында өз пікірін білдірді. Сондай-ақ әділ қоғамды дамыту, ұлттық рух пен халқымыздың бәсекеге қабілеттілігін арттыру мақсатында ұсынылған «Халықтық мемлекет» мақаласының тұжырымдамасына да тоқталды.
Абайдың ұлттық бірегейлік, мемлекет және әлеуметтік даму идеяларын ілгерілетудегі тарихи рөліне баса назар аударды. Ұлттық болмыстың үлгісі жайлы пікіріңіз бен дүниежүзілік сипат алған теріс тенденция – популизм туралы ойыңыз деген қатысушылар тарапынан қойылған сұрақтарға жауап берді. Қатысушыларды алдағы уақытта ой-өрісімізді кеңейтіп, рухани тұрғыдан дамуымыз үшін өткізілмекші болып отырған данышпан ақынға арналған шараларға қатысып, рухани дүниемізді кеңейтуге шақырды.
Іс-шара «Абайдың баға жетпес мұрасы» және «Абай әлемі» атты кітап көрмесімен толықтырылды. Абай шығармашылығына байланысты кітаптар мен Абай мұрасын түрлі тілдерде насихаттайтын кітаптар және 2018-2019 жылдары «Абай әлемі» кітаптар топтамасы бойынша жарық көрген басылымдарға шолу жасалды.
Абайдың музыкалық мұрасын Абай атындағы кітапхананың маманы Қ.Кенжебекұлы жаңғыртып «Өлсем орным қара жер, сыз болмай ма» әнін орындап, өз шығармашылығынан ақынға арнаған «Жар» өлеңін оқыды. Іс-шара қонақтарының қатары «Рух-сана» поэзия клубының кішкентай қатысушыларымен толығып, олардың орындауында Абай өлеңдері нақышына келтіре оқылды.
