Абай таныған кәусарлар: ақпараттық сағат

19 ақпан күні №47 жалпы білім беретін орта мектепте  Семей қаласы мектептерінің кітапханашылары үшін ұйымдастырылған  «Біз Абай жолымен жүреміз» атты семинарда Абай атындағы кітапхана қызметкерлері «Абай таныған кәусарлар» тақырыбында ақпараттық сағат өткізді.

Семинар барысында  кітапхана қызметкерлері Абай дүниетанымын кеңейткен халықтың сарқылмас мол қазынасы халық ауыз әдебиеті, орыс классиктерінің шығармалары, Европа ойшылдарының еңбектері, Абайдың орыс достары жайында мол мағлұмат берді.

Абай қаладағы қоғамдық кітапханаға келіп, Е.П. Михаэлиспен танысады.  Осы Е.Михаэлистің ұсынысы бойынша сол кездерден бастап Абай белгілі абайтанушылардың еңбектеріне қарағанда, орыстың атақты ақын-жазушыларынан: Пушкин, Лермонтов, Толстой, Салтыков-Щедрин, Некрасов,  сыншыл ойшыл демократтардан: Белинский, Герцен, Чернышевский, Добролюбов; Европа ақындарынан Гете, Байрон, философтардан Спенсер, Спиноза, Льюис, Дарвин, Дрэпер т.б. оқыған.

Кітапханашы мамандардың назарына  кітапхананың сирек басылымдар қорындағы Абай таныған қазыналы кәусарлардан видеопрезентация ұсынылды. Онда Абай оқыған кітаптар, XIX ғасырдың соңындағы қаланың мәдени өмірінің дамуына үлес қосқан  саяси жер аударылғандар – Абайдың орыс достары,  өлкетану деректеріндегі Абай дәуірі орын алды. Шара соңында  семинар ұйымдастырушы №47 мектеп әкімшілігі  кітапхана қызметкерлеріне  алғыстарын жеткізді.