2020 жылдың 16 қыркүйегінде ШҚО Абай атындағы әмбебап кітапханасының инстаграм желісінің тікелей эфирінде әр сәрсенбіде өтетін «Жастықтың от жалында» жобасы аясында кезекті жас ақынмен тікелей эфир өткізілді. Эфир қонағы өлең өлкесінде қанатын қағып, қалам тербеп жүрген жас буын Байқуат Қуатбайтегі болды.
Аталмыш жобаның мақсаты өнерлі жастарды оқырмандарға таныс ету болғандықтан, қонағымыздың туып өскен жерінен бастап, қазіргі таңда немен айналысып жүргеніне дейін қанық болдық.
Кіндік қаны Орда тауына тамып, буыны сол ауылда бекіп, Мамай батыр атындағы мектепті тамамдаған талапкердің білімін әрі қарай Мұхтар Әуезов атындағы педогогикалық колледжі жетілдірген екен. Қазіргі таңда Өскемен қаласында қызмет атқарып жүрген жас талап өлең жазудың реті келмей жүргенінде жасырмады.
«Есіміңізді кім қойды?» – деген сұраққа, өз тегінде өлеңге жақын Төкен атасы Қуатбай атасының есімін ауыстырып Байқуат қойғанын, өзіне өлең мен өнер осы Төкен атасынан қонғанында айтып өтті. Бұрын жырға жақын атасының жазған өлеңдерін жинақтап шағын кітапша етіп шығарса, қазір сол кітапшаны толықтырып бір кітап етіп шығаруды жоспарлап жүргенінде тілге тиек етті.
Аға буын ақындардың ішінде Қалқаман Сарин, Ақберен Елгезек, Жадыра Байбұланова сынды ақын аға-әпкелерінің жырларын жанына серік қылған жас ақын, біздің оқырмандарымызға да өз өлеңдерін қонақ кәде етіп ұсынды.
Көңілі аңғал, жүрегі таза жалынды жас ақынның өлеңі махаббатты жырлауға бейім екенін аңғардық. Болашағына ақ жол тілеп, қаламынан мөлдір лирика төгілеріне сенім артып эфирімізді аяқтадық.
Comments are closed.