2020 жылдың 14 қазанында ШҚО Абай атындағы әмбебап кітапханасының инстаграм желісінің тікелей эфирінде әр сәрсенбіде өтетін «Жастықтың оты жалында» жобасы аясында кезекті автормен тікелей эфир өткізілді. Эфирдің бұл жолғы кейіпкері кітапханамыздың қызметкері, республикалық және халықаралық жыр бәйгелерінің жеңімпазы Бауыржан Игілік болды.
Кітапханамыздың ұйымдастыруымен өткізілетін талай эфирдің жілігін шағып, майын ішкен Бауыржанның өзіменде сұқбатымыз бірінші рет өтіп отырған жоқ.
Желідегі байланыс ақынның жан маусымы жайлы жағымды әңгімесімен басталды. Ақын жаны тек төрт мезгілді ғана емес өзі тыныштық табатын ғажайып әлемдегі бесінші маусымды қатар сезінетінін және әр ақынның өзінің шығармашылығы өнім беретін бір маусымның болатынын көркем тілмен жеткізді. Өзінің жанына қыс мезгілі оқу, ізденумен, ал күз мезгілі өлеңнен өнім ұсынатын айлар екенін жасырмады.
Өлең мен өмірде бірдейсіз бе? – деп қойған оқырмандар сұрағына ақын өз-өзіне әділетті екенін, жаны қалаған жырды қағаз бетіне түсіріп, ойына алған істі бүкпестен жүзеге асырып келе жатқанын, адамдық пен ар алдында адал екенін сауалдың жауабымен қоса түсіндірді.
Сонымен қатар бүгінгі қоғамға және бүгінгі қоғамның жас қаламгерлеріне не жетіспейді, пайым парасатты дамыту үшін адамның бойынан қандай қасиеттер табылу керек, Абай сөзі бүгінгі жастарды тәрбиелей ала ма – деген сұрақтарға өздік ой қосты.
Сұқбат соңында ақын оқырмандарымызды бір кісідей жұмыла еліміздің мүддесі үшін қызмет қылып, оқу мен өнерде алда болу шақырды.
Comments are closed.