Абай Құнанбаевтың чех тіліндегі «Қара сөздері»: халықаралық онлайн-таныстырылым
29 қазанда Абай Құнанбаевтың 175 жылдығын мерекелеу аясында Абай атындағы облыстық кітапхана Чехиядағы Қазақстан Елшілігінің Қазақстан Республикасы Ұлттық академиялық кітапханасымен бірлесіп өткізілген Абай Құнанбаевтың чех тіліндегі «Қара сөздері» кітабының халықаралық онлайн-таныстырылымына қатысты. Тұсаукесерге қазақстандық дипломаттар, Қазақстан мен Чехияның ғалымдары мен жазушылары, мәдениет қызметкерлері қатысты.
Чехиядағы Қазақстан Елшілігінің өкілдері Абайдың қара сөздерінің ерекше маңыздылығын атап өтті.
Чехиялық «Азия достары клубының» жетекшісі, профессор, философия ғылымдарының докторы Йиржи Шима өз сөзінде Абайдың қара сөздерін жариялау, чех халқына, әлем әдебиетіне орасан зор үлес қосқан қазақтың ұлы ақыны шығармаларымен танысуға мүмкіндік береді деп айтты.
Карлова Университетінің профессоры Томас Кучера ұсынылған басылымның ерекшелігін атап өтті және бұл кітап чех оқырмандарына қазақ халқының мәдениетін жақсы түсінуге мүмкіндік беретінін тілге тиек етті.
Қазақстан Республикасы Ұлттық академиялық кітапханасы басшысының орынбасары – Әлия Қожабекова, ақын, Қазақстан Жазушылар одағының төрағасы – Ұлықбек Есдәулет және М.Әуезов атындағы Әдебиет және өнер институтының директоры, ҚР еңбек сіңірген қайраткері – Кенжехан Мамытжановтар Абай шығармалары мен аудармаларының маңыздылығына тоқталды.
Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейінің ғылыми-зерттеу және қор бөлімінің бастығы Маржан Мұхамедова желідегі таныстырылымға қатысушылармен музейдің тарихымен, ақынның мерейтойына орай музей залдарын қайта жаңартуға байланысты өзгерістерімен бөлісті. Музейдегі Абайдың «Қара сөздеріне» арналып ашылған залды ерекше атап өтті.
Абай кітапханасының маманы Ольга Мальцева шараға қатысушыларды ұлы ақын оқырманы болған Абай кітапханасының тарихымен таныстырды. Абайдың рухани орталығының қызметіне, Абайдың кітапханадан оқыған орыс жазушылары мен Батыс Еуропа ғалымдарының еңбектеріне, өлкетану басылымдарына және олардың беттерінде жарияланған ақынның әлеуметтік қызметі туралы мәліметтерге ерекше назар аударды.
Іс-шара Абай Құнанбаевтың әндері мен өлеңдерін орындаумен сүйемелденді.
