АҚШ-да пандемия уақытындағы оқу үрдісі: онлайн кездесу
19 желтоқсанында Абай атындағы кітапхананың шетел әдебиеті бөлімі жанындағы ағылшынша сөйлесу клубының қатысушылары, ZOOM платформасы аясында американдық Аманда Либерманмен кездесті. Аманда Либерман – 2017-2018 жж. осы Абай кітапханасында ерікті болып жұмыс істеген. Ал, қазіргі уақытта Бостон қаласының тұрғыны, Йель университетінің студенті. Ол «АҚШ-да пандемия уақытында оқу жағдайы» презентациясын дайындады және пандемия жағдайында мектептер мен университеттерде онлайн режимінде оқуда қиындық туғызған мәселелер бар екенін айтты. Олардың ішінде ол эксперименттік оқытудың жоқтығын атап өтті. Тұрғындардың барлық санаттарында ғаламтордың қолжетімсіздігін алға тартып, адамдардың көпшілігінің пандемиядан зардап шеккендігін әңгімеледі.
Ол сондай-ақ, осы жағдайда әлеуметтік тұрғыда аз қамтылған отбасылар мен ауыл тұрғындары ерекше зардап шеккенін атап өтті. Аманда өз тарапынан пандемия уақытында АҚШ-та көптеген проблемалардың анықталғанын айтты. Атап айтқанда: нәсілдік теңсіздік, қол жетімді денсаулық сақтаудың болмауы, мұғалімдердің табысының төмендігі. Сонымен қатар, кәсіпорындар мен мектептер қайта ашылған кезде, көптеген американдық мұғалімдер мен басқа да маңызды салалардың қызметкерлері опат болғаны жайында да айтып, пандемия американдықтардың қиын жағдайдан шығу қабілеттілігін көрсеткендігін атап өтті.
Аманда онлайн қатысушыларға пандемия жағдайында американдық білім беруден сыр шертетін суреттерден тұратын «Көргендеріңді айт!» атты шағын ойынды ұсынды. Ол АҚШ-тағы білім беру жүйесі туралы көптеген сұрақтарға жауап беріп, шараға қатысушыларды келе жатқан Рождество мерекесімен құттықтады.
