Алаш мұраты және Смағұл Сәдуақасов: бейнелекция
10 наурыз күні Абай атындағы кітапхананың «Алаш» онлайн-жобасының кезекті шығарылымы аясында ф.ғ.д., профессор Дихан Қамзабекұлы «Алаш мұраты және Смағұл Сәдуақасов» атты бейнелекция өткізді.
Дихан Қамзабекұлы мемлекет және қоғам қайраткері Смағұл Сәдуақасов жайында мол мағлұмат бере отырып, Алаш тарихында әлі де көптеген ақтаңдақтар бар екендігін де ортаға салды. Смағұл Сәдуақасов қамшының сабындай қысқа ғана ғұмырын қазақтың азаттығы мен теңдiгiне арнап, Алаш жұртының азаттығын аңсаған қайсар ұл қылышынан қан тамған қилы заманға, тоталитарлық жүйеге қарсы тұрды. Дәріс барысында оқырман қауымына өзінің «Смағұл Садуақасұлы» атты монографиясын да таныстырып өтті. Келелі кездесу барысында оқырмандар Смағұл Сәдуақасов кім? Қандай азамат болған? Бүгінгі Тәуелсіз Қазақстан үшін не істеді? Неге атылды? Неліктен трагедиялық жағдайға ұшырады? Неге біз оны әлі күн жете танымаймыз? – деген сұрақтардың жауабын оқырман қауым осы дәрістен тапты.