Еңбегі еселенген кәсіпкер: тікелей эфир
Сәуір айының 13 жұлдызында ШҚО Абай атындағы кітапханасы инстаграм желісінің тікелей эфирінде кәсіпкер, «Pane» мейрамханасының негізін салушы Ербол Мусанов мырзамен «Еңбегі еселенген кәсіпкер» тақырыбында сұқбат өткізді.
Сұқбат барысында Ербол мырза өзінің қарапайым отбасынан шыққанын, кәсіпкерлік жолға өмір ағысымен келгенін және рестораторлық бизнес саласына түспей тұрып басқа кәсіп түрлерімен айналысып көргенін жасырмады.
Кәсіпкердің бойынан табылуы керек бірінші қасиет ол өзге адамдар көрмеген дүниені көре алу дейді. Жұрт байқамайтын кәсіпке қолайлы орындарды таңдау болса, екінші төзімділік – жолыққан қиындыққа қарсы тұру, кезіккен кедергіге берілмеу дейді кәсіпкер.
Сонымен қатар желідегі қонағымыз өзі дөңгелетіп отырған «Pane» мейрамханасының жасалып жатқан жұмысы туралы да айтып берді. Ол жерде қызмет атқаратын – аспаз, даяшы, бармен, әкімшінің барлығы қаламыздағы арнаулы колледждардан білім алып, аталмыш мейрамханада іс-тәжірибеден өтіп, үздіктері сол жерде жұмыс жүргізіп жатқанын білдік.
Оқырмандарымыз тарапынан қойылған сұрақтарға шынайы жауап беріп эфиріміздің шырайын келтірген кәсіпкер жұртты таңқалдырып, дәмі таңдайда қалып жүрген мейрамхана ауласында сатылатын балмұздаққа қалай қол жеткізгенін жасырмады. Бір ай көлемінде түрлі қаладан, түрлі балмұздақ татып көріп, өзіне керек дәмдісін таба алмаған Ербол мырза ақыр соңы Ташкент шаһарынан бірақ шыққанын тілге тиек етті. Ала шапанды ағайындардан жаңа дәмнің жасалу жолын үйреніп қаламыздың халқын осылай таңқалдырғанын айтып ағынан жарылды.
Инстаграм желісінен ағылып келіп жатқан оқырман ықыласына бөленген Ербол мырза барынша шынайы, әрі эфиріміздің қызықты кейіпкеріне айналып, жас буын жас кәсіпкерлерді қолдайтынын, қолынан келгенінше өзі жиған тәжірибесімен бөлісуге дайын екенін айтып, сөзін аяқтады.
