ХХ ғасыр басындағы ұлт зиялылары: тікелей эфир
2021 жылдың 20 сәуір күні ШҚО Абай атындағы кітапхананың Facebook желісінің тікелей эфирінде «Алаш» жобасы аясында ҚР судьялар одағының мүшесі, отставкадағы судья Азанбаев Марат Ақторғайұлы «ХХ ғасыр басындағы ұлт зиялылары» тақырыбында әңгіме өрбітті.
Тікелей эфирде Қарағанды қаласынан келген кітапханамыздың оқырманы, мейманы Марат Ақторғайұлы алдымен өзін таныстырып өтті. Марат Ақторғайұлы ХХ ғасырдағы Алаш зиялыларының, Алаш Орданың, Алаш партиясының тарихтағы орнын анықтау үшін заңнамалық сараптама өткізу керектігін айтты. Ресей империясының отарлау саясатының себебінен қазақ елі, қазақ жері өзін-өзі билеу, басқару құқығынан айырылып қалғандығы жөнінде тоқталды. Тарихи негізге сүйене отырып сол кезде Алаш партиясының ұйымдастырылуы жөнінде кеңінен мағлұмат берді.
Ол тарихи оқиғаларды талдап, сұрыптап саралайтын, бағалайтын әдістемелік жүйеге, негізге бағыну керектігін атап өтті. Әдістемелік негізді Шәкәрім сөзімен айтқанда: «Рух – дінсіз таза ақыл», ал, «Таза ақыл – ол заң, құқық» дегенін Марат Ақторғайұлы мырза заңгер көзқарасымен нақтылай түсті.
Қазақ мүддесінің бұзылуы, қазаққа жасалған қиянат екенін түсінген сол кездегі алдыңғы қатарлы озық ойлы азаматтар Әлихан Бөкейханов, Құдайберген Жұбанов, Мұстафа Шоқай, т.б. тәуелсіздіктің мүмкіндігі ұшқындаған тұстан-ақ ұлттық-демократиялық сипаттағы мемлекет құруды мақсат еткендігі жөнінде және осы Алаш қайраткерлерінің күресін, олардың ерен еңбектеріне жан-жақты тоқталып, мағлұмат берді.
Желі пайдаланушылары және кітапхана оқырмандары жалпы қазақ еліндегі Алаш қозғалысының бастамасы мен тарихи жолы туралы мағыналы ауқымды ақпарат алды.
