Әлем мойындаған Нобель сыйлығының лауреаттары: көрме-шолу

29 сәуір күні Абай атындағы кітапханада «Әлем мойындаған Нобель сыйлығының лауреаттары» атты тақырыпта көрме-шолу ұйымдастырылды. Көрмеге әдебиет саласы бойынша Нобель сыйлығын алған шетелдік және орыс ақын-жазушылардың шығармалары қойылды. Көрмені  Назарбаев зияткерлік мектебінің 12 сынып оқушылары келіп тамашалады.

Көрмемен таныстыру барысында халықаралық Нобель сыйлығының  шығу тарихымен таныстырып, әдебиет саласы бойынша қай уақыттан бастап беріле бастағаны жөнінде ақпарат берілді.

Әдебиет саласы бойынша Нобель сыйлығы 1901 жылдан бастап беріледі. Кітапхана қорындағы осы құрметті атаққа ие болған, әлемдік әдебиеттің қақ төрінен ойып тұрып өз орнын алған Бернард Шоу, Томас Манн, Иван Бунин, Уильям Фолькнер, Эрнест Хемингуэй, Михайл Шолохов, Ясунари Кавабата, Генрих Белль, Гарсиа Маркес, Октавиа Пас, Кэндзабура Оэ сынды әйгілі ақын-жазушылардың шығармалары оқырман назарына ұсынылды. Нобель сыйлығын алған ақын-жазушының  айы оңынан туып, жұлдызы жанып, бағы ашылып, шығармалары әлемнің  көптеген  тілдеріне аударылып, миллиондаған данамен басылып шығатыны белгілі.

Шара барысында Нобель сыйлығына ие болған лауреаттар жайында, шығармашылық мұрасы жайында кеңінен айтылып, шолу жасалынды.