Алаш мұрасы: тікелей эфир
11 мамырда Instagram әлеуметтік желісінде қоғам қайраткері, Алашорда үкіметінің мүшесі, Ресей Мемлекеттік Думасының депутаты Ахмет Бірімжановтың туғанына 150 жыл толуына арналған тікелей эфир өтті.
Тікелей эфирдің қонағы Ахмет Бірімжановтың шөбересі Лейла Айтхожина әйгілі атасы туралы әжесі мен анасынан естіген естеліктерімен бөлісті. Атап айтқанда, эфирде Ахмет Қорғанбекұлының жеке және отбасылық өмірі, қызметі, ұрпағының тағдыры жайлы айтылды. Көрермендердің назары Бірімжановтар отбасындағы үлкен мән берілген білімге аударылды, әсіресе Ахмет Бірімжановтың әйелі – Гүлжауһар Әлмұхамедқызы Сейдалина-Бірімжанова туралы әңгіме қызықты болды. Гүлжауһар Ыбырай Алтынсарин мен ағайынды Сейдалиндер ұйымдастырған Ырғыздағы интернатта тәрбиеленген алғашқы қазақ қыздарының бірі болды. Ахмет Бірімжановтың әйеліне көрсеткен құрметі туралы естеліктер өте әсерлі болды.
Тікелей эфир барысында Лейла Нариманқызы Айтхожина өзінің әйгілі атасының лайықты ұрпағы ретінде Ресей мемлекеттік тарихи архивінен Ахмет Бірімжановтың бүкіл еңбек жолы мен қоғамдық жұмыстарын ашатын құжаттарды жинағаны жайлы әңгімелеп берді.
Сондай-ақ, эфирде Ахметтің інісі Ғазымбек Бірімжанов жайлы да әңгіме айтылды, көрермендерге фотосуреттерді, оңалту туралы құжаттарды көруге, репрессия туралы, Бутово-Коммунаркадағы мемориалдық тақта туралы әңгімелерді тыңдауға мүмкіндік берілді.