Бақытты балалық шақ: тікелей эфир
Мамыр айының 14-ші жұлдызында ШҚО Абай атындағы кітапхананың инстаграм желісінің тікелей эфирінде ақын, журналист, «Серпер» жастар одағы сыйлығының иегері, «Qazaqstan» ұлттық телеарнасының сценаристі Олжас Қасыммен «Бақытты балалық шақ» тақырыбында онлайн сұқбат өтті.
Эфир барысында биылғы жылы негізге алынып отырған «Балалар әдебиеті» төңірегінде сөз қозғалды. Неге әлі күн кеңестік дәуірдегі жазушыларымыздың ғана бал тілді оқырманға қалдырған әдебиеті қолданылып келеді? Бүгінгі балалар әдебиеті қалай дамуда? Жас қаламгерлер қаншалықты осы әдебиеттің дамуына үлес қосып, қаншалықты көңіл бөлініп жатыр?- деген сұрақтармен желідегі жүздесудің мағынасы ашылды.
Осы орайда қонағымыз балалар әдебиеті еліміздегі әдеби саланың іргелісі екенін, бірақ осы сала төңірегінде көптеген мәселелер барын тілге тиек етті. Мәселен, аталмыш әдебиетте жас оқырмандарды қызықтыруда Европа қарыштап дамып кеткені, ал бізде көбіне балалардың жас ерекшеліктеріне байланысты танымына сәйкес келе бермейтін, сыртқы безендірілуі, ішкі мазмұны жағынан ақсап жатқаны жасырын емес дейді Олжас мырза.
Сонымен қатар республикамызда балаларға арналған арнайы әдеби бәйгелердің жоқтығы, болса да ауқымды бір байқаудың бір ғана номинациясы болып немесе дәстүрлі түрге айналмай, айналасы бір-екі шарамен шектеліп қалып жатқаны балдырғандарымыздың әдебиетке деген құлшынысын арттыруға кері әсерін тигізіп жатқанын жасырмады.
Сөз соңында қазіргі уақытта балалар әдебиетін дамытуға үлесін қосып жүрген қаламгерлердің бар екенін біліп, және алдағы уақытта осынау кенжелеп қалған әдебиетімізді дамытуға жұмыла күш салып, ақындар балауса жырына арқау етіп, жазушыларымыз ғажайыбымен қанаттандырып, режиссерларымыз көгілдір экранға ұсынса балапандарымызға арналған саланың қарыштап дамитыны сөзсіз деген қортындыға келдік.