31 – мамыр қуғын-сүргін және аштық құрбандарын еске алу күні: кең көлемді кітап көрмесі
31 мамыр күні Алаш арыстарының тұяғы, белгілі ақын, жазушы, қоғам қайраткері, ұстаз Қайым Мұхамедханұлының ескерткішінің алдында «31- мамыр қуғын-сүргін және аштық құрбандарын еске алу күніне» орай жиын өтті. Жиынға Семей қаласының әкімдігі, мәдениет ошақтарының қызметкерлері, зиялы қауым өкілдері, жас ақындар қатысты. Шара барысында Қала әкімі Нұрымбет Аманұлы Сақтағанов өз сөзінде Саяси қуғын-сүргін құрбандарын еске алу күні біздің елімізде бірнеше жылдан бері атап өтіліп келе жатқан және Қазақстан халқы үшін маңызы зор қайғылы күн екенін атап өтті. Қазақ зиялыларының ең мықты өкілдері: жазушылар мен ақындар, мәдени-ағарту қызметкерлері қуғын-сүргінге ұшырады. Сол жылдары ел Ә.Бөкейханов, С.Сейфуллин, М.Жұмабаев, Ж.Аймауытов және басқалар сияқты көрнекті тұлғаларынан айырылғаны турасында сөз қозғап, Қайым Мұхамедханұлыгның ескерткішіне гүл шоқтарын қойды. Қаламыздың жас ақындары Темірлан Темірбай, Жақсылық Асқарбек, Байекенова Дильназ жыр шумақтарын оқып, бабалар рухына тағзым етті. Халықаралық «Абай» қорының төрағасы Отантай Кәріпжанов Қайым жайлы тебіреніске толы сөз сөйлеп, естеліктерімен бөлісті.
Аталмыш шараға Абай атындағы әмбебап кітапханасы кең көлемді кітап көрмесін ұйымдастырды. Көрмеге ұсынылған кітаптарда саяси қуғын-сүргін кезеңіндегі тарихи оқиғалар, репрессияға ұшыраған және ХХ ғасырдың 30-жылдарында атылған қазақ зиялыларының еңбектері туралы нақты мәліметтер қойылды. «Алаш» партиясының арыстарының еңбектері, атап айтқандай Әлихан Бөкейханның 15 томдық, «Алаш» кітаптар топтамасының 10 томдығы, Райымжан Мәрсековтың «Қазақ қайда барады?», ұлтымыздан шыққан тұңғыш профессор Санжар Асфендияровтың еңбектері, т.б 20 ғасыр басындағы қазақ интилегенциясының шығармалары ұсынылды. Кітап көрмесімен Семей қаласының әкімі Нұрымбет Аманұлы бастап, қала тұрғындары арнайы танысты. Көрме Алаш қайраткерлерінің, оның ішінде Әлихан Бөкейханов, Ахмет Байтұрсынов, Міржақып Дулатов және Райымжан Мәрсеков портреттерінің фотогалереясымен толықтырылды.
