Құрметті Досым, Сізге туған қалам туралы хат жазамын : халықаралық акция

2021 жылдың 1 маусымы Балаларды қорғау күніне орай, ШҚО Абай атындағы кітапханасы Белоруссия мемлекетіндегі В.И.Ленин атындағы облыстық Могилев кітапханасындағы әріптестермен ZOOM платформасы арқылы «Құрметті Досым,  Сізге туған қалам туралы хат жазамын» : атты халықаралық  акциясын өткізді. Аталмыш акцияға Семей қаласы мен Могилевтен 15-16 жас аралығындағы жас оқырмандар (барлығы 12 қатысушы) қатысты. Жасөспірімдер өз қалаларының тарихы, көрнекті жерлері мен қызықты оқиғалары туралы жазысып өзара хаттар алмасты. Жеңімпаздарды анықтау мақсатында, нақтырақ айтқанда өте тартымды  тілмен әрі сауатты жазылған хаттарды бағалауда екі кітапхана бір-бірлерінің қатысушыларын жекелеме баға берді. Онлайн отырыста қорытынды нәтижелер анықталып, жеңімпаздардың хаттары оқылды. Атап айтқанда Семей қаласының үздік хаттары: Ж.Жанатов (№25 мектеп, 8-сынып) – 1 орын, А.Попазова (№43 мектеп, 9 сынып), Ә.Айманов («Жасұлан» ерлер лицейі, 9 сынып), К.Украинченко (9 сынып).

Могилев қаласының жеткіншегі М.Садовская өзінің ерекше хат жазу стилімен бағалаушыларды баурай отырып, 1- орынды иеленсе, А.Таратынова 2-орынды, ал А.Застрелов 3-ші орынды еншіледі. Сондай-ақ қарындаш пен бояуға тіл бітіріп, өз туған қалалары жайында сурет арқылы жеткізген Могилевтік қатысушылар А.Астапкова, Д.Болеволенская, П.Старовойтова, А.Мисюралар еңбектері де аталып өтілді. Халықаралық акцияның барлық жеңімпаздары мақтау қағаздарымен, сыйлықтармен марапатталса, қатысушылар алғыс хаттарға ие болды. Онлайн кездесу соңында екі кітапхананың қызметкерлері өз қалаларының көрікті жерлері, тарихи сырларымен таныстырып, өзара пікір алмасты.