Мемлекттік рәміздер – ұлт мақтанышы: патриоттық сағат

4 маусым күні  «4 маусым – Қазақстан Республикасының рәміздер күнін» мерекелеу аясында Абай атындағы кітапхананың  балалар әдебиеті бөлімінің қызметкерлері  жас жеткіншектердің бойына патриоттық сезімдерін қалыптастыру, Қазақстан Республикасының рәміздерін қастерлеу мақсатында Ж. Аймауытов атындағы жалпы орта білім беретін мектеп оқушылары арасында «Мемлекттік рәміздер – ұлт мақтанышы» атты патриоттық сағат өткізді.

Мемлекеттік рәміздер – бұл кез келген мемлекеттің егемендігі мен біртұтастығын бейнелейтін, оның ажырағысыз атрибуттарының бірі болып саналады.

Қазақстан Республикасының мемлекеттік әнұранымен ашылған мәдени шара барысында  оқушыларға рәміздердің шығу тарихы мен қалыптасу кезеңдері және ұлттық нышандардың авторлары жайында  тың ақпараттар берілді. Қатысушылар Отан, Туған ел, Достық туралы мақал-мәтелдер айтып, «Кім алғыр», «Жалғасын тап», «Тәуелсіздік» атты викториналық ойындарға белсене қатысып отырды, сонымен бірге  «Еліміздің мемлекеттік рәміздері  және оның қалыптасу тарихы» атты бейнероликпен танысты. Арнайы жасақталған « Мемлекеттік рәміздер –ел мақтанышы»  тақырыбындағы кітап көрмесінде балдырғандардың ерекше назарын аударған, бастауыш мектеп жасындағы балаларға арналған қазақы нақыштармен өрнектелген, 2015 жылы «Кітап баспасы» басып шығарған, 67-ші Франкфурт кітап жәрмеңкесінде жоғары баға алған «Менің Отаным-Қазақстан» киіз үй – кітабы болды. Бұл кітапта мемлекеттік рәміздер, еліміздің картасы,  қазақ дастарханы, салт-дәстүрлер, сәндік-қолданбалы өнер,  Қазақстан облыстары жайлы кеңінен түсіндірілген.  Шара соңында барлық қатысушылар ақын Алмас Сақбаевтің сөзіне жазылған  «Көк тудың желбірегені» атты патриоттық әнді бірлесіп айтумен аяқтады.