10 тамыз – Абай күні: іс шаралар топтамасы
10 тамыз – Абай күнінде Шығыс Қазақстан облыстық Абай атындағы әмбебап кітапханасында қазақтың ұлы ақыны Абай Құнанбаевтың 176 жылдығына арналған бірқатар іс-шаралар өтті.
Мерекелік шаралар ақынның ескерткішіне гүл шоқтарын қою рәсімінен басталды. Гүл қою рәсімінде Семей қаласының әкімі Баяхметов Бақытжан Кәкенқажыұлы, Семей қаласы әкімінің орынбасары Садырбаев Айдар Серікқазыұлы, қалалық мәдениет саласының мамандары, абайтанушылар және қаламыздың зиялы қауым өкілдері болды.
Кітапханамызда аудандық және ауылдық кітапханалардың кітапханашылары үшін ZOOM платформасында кітапхана сайтында орналасқан “Абай ойының ұлылығы” виртуалды көрмесі бойынша экскурсия ұйымдастырылды http://abay175.semeylib.kz/ru/.
Әріптестерге виртуалды көрменің «Артық білім кітапта», “Жүрегімнің түбіне терең бойла”, “Абайдың ұрпақтары”, “Абайдың шәкірттері”, “Абай және өнер”, “Абайтану” бөлімдері және осы бөлімдерде орналасқан ақпараттар мен материялдар ұсынылды. «Артық білім кітапта» бөліміне ерекше назар аударылып, онда қатысушылар Абай оқыған кітаптармен, ақынның қоғамдық қызметі мен Абай дәуірін суреттейтін сирек кездесетін өлкетану басылымдарымен танысты.
Шаралар топтамасын “Абай менің жүрегімде” челленджі жалғастырып, жас оқырмандар Нусурбаев Ансат, Батырхан Сабина, Габитова Айша және Ринатқызы Айғаным ақынның сүйікті өлеңдерін оқыды.
Балалар әдебиеті бөліміне келген кішкентай оқырмандарымыз бұл күні қызықты кітап алып қана қоймай, “Абай” көркем фильмін де тамашалай алды.
«Артық білім кітапта» кітап көрмесі кітапхана пайдаланушыларын Абай Құнанбаевтың шығармаларымен, оның өмірі мен қызметі туралы әдебиеттермен, сондай-ақ “Абай әлемі” кітаптар сериясында басылған ақын шығармашылығын зерттеушілердің еңбектерімен таныстырды.
