Сыбайлас жемқорлықтың алдын алу: кездесу

Ағымдағы жылдың 22 қыркүйегінде облыста парасаттылық мәдениетін ілгерілету бойынша 2021 жылға арналған кешенді жоспар аясында TedX форматында ҚР Мемлекеттік «Дарын» жастар сыйлығының иегері, Семей қаласының Жазушылар одағының төрағасы, ШҚО Сыбайлас жемқорлыққа қарсы Департаментінің Семей қаласы бойынша «Парасат жолы» орталығының жетекшісі, ШҚО Абай атындағы әмбебап кітапхананың маманы Мерей Қартпен кездесу өтті.

Кездесудің басты мақсаты жастар арасында сыбайлас жемқорлықты болдырмау  және парасаттылық идеологиясын ілгерілету болғандықтан, осы бағыттағы жұмыстарды күшейтуге негізделді.

Шара барысында Мерей мырза тек жастар үшін ғана емес, жалпы қоғам үшін адам боп қалу маңызды екенін тілге тиек етіп, қазіргі жаңа заманның гүлденуі  адалдықтың көшін бастаған азаматтардың қолында екенін айтты.

Кездесу барысында жастар ой-пікірлерін білдіріп, көкейлерінде жүрген сұрақтарына жауап алды. Сонымен қатар кеш қонағы Мерей мырза жалпы жастардың бәрін қоғамның осынау жемқорлық дейтін дертін жұмыла емдеуге шақырды. Ашық пікір алмасудың соңында жастар ақыннан қонақ кәде сұрап, жыр оқуға қолқа салды.

Тұшымды ой, татымды пікір айтылып, өрелі өлең оқылып, жас буынның бойына қазақы қан жүгіріп, ұлттық рух оянып, келелі кештен болашаққа қуат алып тарқасты.