Қазіргі заманауи мемлекеттің тиімді стратегиялық міндеттері: экспресс-мінбе
5 қазан күні Абай кітапханасының мамандары Жоғары гуманитарлық заң және техникалық колледжінің оқытушылары мен студенттеріне «Қазіргі заманауи мемлекеттің тиімді стратегиялық міндеттері» атты экспресс-трибуна өткізді.
Іс-шара барысында ҚР Президенті Қ.Тоқаевтың «Халық бірлігі және жүйелі реформалар – ел өркендеуінің берік негізі» атты Жолдауында атап өтілгендей Қазақстанның 2025 жылға дейінгі экономикалық, саяси және әлеуметтік дамуының негізгі басымдықтары туралы жан-жақты ақпараттар берілді.
Экспресс-мінбеде кітапхана мамандары білім беру, денсаулық сақтау, агроөнеркәсіптік кешенді реформалау, банк жүйесін дамыту және ипотекалық несиелендіру бағыттарында атқарылып жатқан міндеттерге тоқталып өтті. Сонымен қатар, халыққа қызмет көрсету, жұмыспен қамту, ауыл шаруашылығы саласында цифрландыруға байланысты сұрақтарға көп көңіл бөлінді.
Студенттер аймақтық саясатты жетілдіру, атап айтқанда, аймақтардың өзін-өзі басқаруы, әкімдерді сайлау туралы ақпараттарды қызығушылықпен қабылдады.
Өткізілген шара біздің еліміздегі еңбекақыны көтерудің негізгі міндеттері, инфляцияны төмендету, «жасыл экономиканы» дамыту, биологиялық ресурстарды сақтау және энергия тиімділігін жоғарылату туралы ақпараттар мен статистикалық мәліметтерден тұратын бейнематериалмен толықтырылды.
