Қуандықтан 10 сұрақ: жоба
2021 жылдың 7-8 қазан күндері аралығында Семей қаласында ҚР Ақпарат және Қоғамдық даму министрлігі қолдауымен «Азаматтық бастамаларды қолдау орталығы» КеАҚ үкіметтік емес ұйымдарға мемлекеттік грантының «Тарих ақтаңдақтары» саяси қуғын-сүргін құрбандарын толық ақтау жобасы» аясында «Салауат» Шығыс Қазақстан облыстық жастар қоғамдық бірлестігінің ұйымдастыруымен саяси қуғын-сүргін құрбандарын еске алуға арналған республикалық ақындар мүшәйрасы өтті.
“Қасіретті жылдар – қасиетті жырлар” атты мүшәйраға еліміздің 17 өңірінен жиналған 25 жас ақын Әлихан Бөкейхан университетінің Алаш қайраткерлері білім алған ғимаратында бақ сынасты.
Аталмыш жыр додасына кітапханамыздың «Қуандықтан 10 сұрақ» жобасының түсірілім жастары барып, әр өңірден келген өлең шеберлерімен сұқбат жасап қайтты.
Сұқбаттың басы Ақтаулық ақын Асылбек Жаңбырбаймен басталып, Көкшетаулық Қуаныш Оспанмен жалғасты. Әрі қарай қойылған сұрақтардың жауабын Керекулік Еламан Қабділәшім беріп, Қызылорда мен Семейдің ортақ баласы Ақжол Түменбай өрелі өлеңін оқыды.
Еліміздің тәуелсіздігін жүрекжарды жырларына қосқан барлық ақындардың тартысты байқауы жиналған қауым мен қазылар алқасын тәнті етті. Шын мықтыны анықтау жауапкершілігі белгілі ақындардан жиналған қазылыр алқасына жүктелді.
