Ел үшін туған есіл ер: танымдық конференция
28 қазан күні кітапханамызда zoom форматында «Ел үшін туған есіл ер» атты танымдық конференция Шұбартау өңірінің Бидайық ауылының тумасы, Қазақстанда Кеңес үкіметін орнатуға белсене қатысқан, өлкемізде ең алғашқы комсомол ұйымдарының бірін құрып, басқарған, ағартушылық қызмет атқарып, орыс-қазақ мектебін ұйымдастырып, балаларға сабақ берген, 1921 жылы небары 24 жасында қашқан ақ банданың қолынан мерт болған Жүнісов Әбдірахман Әлімханұлына арналды. Бүкіл саналы ғұмырын қазақ елінің жарқын болашағына арнаған жас қыран қайраткерлік қызметін Қарқаралыда атқарған.
Шараға Аягөз қаласынан қатысқан Қазақстан Жазушылар Одағының мүшесі Ақаш Көксегенұлы естеліктері мен арнау өлеңін оқып, Ә.Жүнісов жайлы бірнеше мақаланың авторы журналист Марат Жұмабайұлы өз пікірін айтты. Баршатастан жыр мүшәйралар жүлдегері, ақын Нәзір Қарабалин Ә.Жүнісовке арнаған, сиясы кеппеген жаңа толғауын оқыды.
ҚР Судьялар одағының мүшесі, отставкадағы судья Марат Ақторғайұлы Азбанбаев жалпы «Қарқаралы қырғыны» атты кітап шығарылып, Әбдірахман Жүнісовке есткерткіш қойылса, оқушылар мен студенттер Ә.Жүнісов жайлы ізденіс, ғылыми жұмыстар жазса деген ұсыныс жасады. Сонымен қатар, Бидайық ауылынан ардагерлер бастауыш ұйымының төрағасы Кәрібаев Жәлел, Малгелді ауылының ақсақалдар алқасы ұйымының төрағасы Нәстілек Сәменбетұлы естеліктерін ортаға салды. Бидайық ауылының «Мұқатай Әбеулов атындағы жалпы орта білім беретін мектебінің» 10 сынып оқушысы Алтынай Жарқынқызы Әбдірахман атасының өмірі жайлы ақпарат берді.
Қарқаралыдан тарихи-өлкетану музейінің бұрынғы директоры Мейіржан Қасымжанұлы, журналист Саят Куанышбайұлы, Семей қаласының облыстық тарихи-өлкетану музейінің маманы Төртенова Гүлнұр Шалатайқызы Ә.Жүнісов туралы тың деректермен бөлісті.
Қарқаралы тарихи өлкетану музейінің кіші ғылыми қызметкері Сәтбек Қабиденұлы мен Саят Куанышбайұлы Әбдірахман Жүнісовтың басына құран оқып, бейнематериалын арнайы жіберген болатын, шара барысында көпшілік назарына ұсынылды. Тұрсын Самханұлының жіберген дереккөздері мен кітапханамыздың қорындағы әдебиеттер негізінде Әбдірахман Жүнісовке арналған кітап көрмесі ұйымдастырылып, слайд көрсетілімі жасалды.
