Достоевскийдің 200 жылдығына арналады: кітап көрмесі

Бүгінгі күнде әлемде ең көп оқылатын авторлардың бірі, уақыттан озып кеткен қаламгер Федор Достоевский.

Тағдырдың жазуымен әйгілі қаламгер өмірінің 5 жылын Семей қаласында өткізген. Осы жылдарда ол «Дядюшкин сон», «Село Степанчиково и его обитатели» сынды сүбелі еңбектерін дүниеге әкелген. Сонымен қатар көрнекті қазақ ғалымы Шоқан Уалихановпен достық қарым қатынасы нығая түскен кез еді ол.

Қаламгердің 200 жылдығына байланысты 11 қарашада қаламызда мерекелік іс-шаралар басталды. Шара Шоқан мен Достоевский ескерткішіне гүл қою рәсімінен бастау алды.

Аталмыш мерекеге Шығыс Қазақстан облыстық Абай атындағы әмбебап кітапханасы да өз үлесін қосты. Абай атындағы театрда  жазушының орыс, қазақ, ағылшын тіліндегі еңбектері көрмеге қойылды.

Көрменің көркін кітапхананың сирек қорындағы «ХІХ-ХХ ғасырдағы  Федор Михайлович Достоевский: Его жизнь и сочинения», «Толық шығармалар жинағы» кітаптары кіргізді. Әсіресе, «Абай әлемі» сериясымен шыққан «Ф.М. Достоевский: Семипалатинский период (1854-1859 гг.)» кітабы көпшілік қауымның қызығушылығын тудырды.

Кітап көрмесін ШҚО мәдениет басқармасының басшысы, Семей қаласының басшылығы, Этномәдени орталықтар, студенттер мен оқушылар тамашалады.