Тағдыр көзі: шығармашылық кеш

Ағымдағы жылдың 3-ші желтоқсаны күні ШҚО Абай атындағы кітапханасында ақын, республикалық және халықаралық жыр мүшәйраларының жүлдегері, әріптесіміз Бауыржан Игіліктің “Тағдыр көзі” атты шығармашылық әдеби-сазды кеші өтті.

Кешке қаламыздың құрметті азаматтары, алдыңғы толқын ақын ағалар, мәдениет ошақтарының басшыларымен өнер майталмандары және ақынның қадірлі оқырмандары қатысты.

Әдеби-сазды кештің ашылуын жасаған ақынның соңынан ерген іні-қарындастары шағын қойылым қойып, өлеңдерін мәнерлеп оқыса, өнердегі достары тыңдарман құлағына жағар ән әуелетті.  Өз кезегінде кештің шырайын келтіруге негізгі арқау болып жатқан “Дариғай” жастар театрының актерлары ақын достарының әдемі өлең өрнегін оқырман жүрегіне жеткізіп оқып берді.

Одан әрі тізгінді өз қолына алған кеш иесі бозбала күнінде жазған жырларын және бүгінгі күнгі туындыларын көрермендердің сұрағына жауап ретінде ұсынып, келген қонақтарын тәтті өлеңмен бір сусындатты.

Кеш соңында ақынның ұстазы ҚР мәдениет қайраткері Дәметкен Серікбайқызы және басқада қаламыздың зиялым қауым өкілдері ақжарма ақ тілектерін ақтарып, талант иесінің алдағы өміріне сәт-сапар тіледі. Кешке қатысқан ақынның ұстаздары, достары, іні-қарындас оқырмандары тамаша көңіл -күймен тарқасты. Кеш өте жоғарғы дәрежеде өтті деген патша көңіл көрерменнің бағасын алды.