«Ер қазақ»: онлайн-кездесу

9-ақпан күні ШҚО Абай атындағы әмбебап кітапханасының ZOOM платформасында әр сәрсенбі күні «Алаш» жобасы аясында журналист-жазушы, Халықаралық Алаш сыйлығының лауреаты, «Құрмет» орденінің иегері Дәулет Сейсенұлымен онлайн-кездесу ұйымдастырылды.

Кездесу барысында Дәулет Сейсенұлының 2021 жылы «Рухани жаңғыру» бағдарламасы аясында «Абай әлемі» жобасы бойынша жарық көрген Қайым Мұхамедхановқа арналған «Ер қазақ» атты кітабы таныстырылды.

Эфир барысы Қайымның әкесі, Алаш арыс¬тарының ардақтысы атанған айтулы халық ағартушысы, белгілі меценат Мұхамедхан туралы әңгімемен басталып, Семейде ту тіккен Алашорда үкіметінің тарихымен жалғасты. Алаш арыстарының тізесінде отырып ержеткен жеткіншек Қайымға олардың жеке бастарының үлгі-өнегесімен әсер еткен игі ықпалы, әсіресе солардың ішінен әкесінің іні досы, жас Мұхтардың нақтылы қамқорлығы жайлы айтылды. Қ.Мұхамедхановтың Абайдың ақын шәкірттері туралы ғылыми диссертациясын соғыстың соңында, дайындағандығы, оны қорғап шығу сол уақыт түгілі елуінші жылдардың басында қатты қарсылыққа ұшырағандығы, ғалым осы еңбегі үшін 25 жылға сотталып, сталиндік лагерьдің азабы мен тозағына түскендігі, ұстазы Әуезовті ешқашан сатпағандығы жайында баяндалды.  Сонау соғыс жылдарының аяғында дайын болған ғылыми еңбегін арада он төрт жылдан соң, яғни 1959 жылы екінші қайтара қорғағандығы және айтулы тұлғаларының еңбектері  пайымдары мен естеліктері туралы әңгімеленді.

Кітап авторы шара соңында: «Бүкіл ғұмырын асыл Абайға арнаған ғалым өмірден өткен соң оның есімін қадірлеп, айшықтау мәселесі де алдымен ел басылымында көтерілген еді. Қазір сол мәселелер өз шешімін тауып, қала орталығындағы басты көшелердің біріне Қайым есімінің берілуі, осындағы Абай көшесінің бойындағы Абай кітапханасының жанында ғалымның бюстінің орнатылуы, бәрі ел егемендігінің арқасы. Халқы барда Абай есімі, Абай барда Әуезов пен оның ізбасар шәкіртінің есімі ешқашан ұмытылмайды», – деп сөзін аяқтады!

Аталмыш шара «Алаш» электрондық кітапханасына енгізіліп, оқырман қауымға ұсынылады.