Жазушы және шеберлік: онлайн жүздесу
2022 жылдың 16 ақпан күні, ШҚО Абай атындағы әмбебап кітапханасы «Абай әлемі» кітаптар топтамасының 2021 жылғы шығарылымын насихаттау мақсатында, жерлесіміз, белгілі танымал жазушы, «Дарын» мемлекеттік жастар сыйлығының лауреаты, әдебиеттанушы, кинодраматург, эссеші – Айгүл Жолдасбайқызы Кемелбаевамен ZOOM арқылы «Жазушы және шеберлік» тақырыбында тікелей онлайн байланыста жүздесу өткізді. Аталмыш іс-шараға қала кітапханашылары және барлық санаттағы оқырмандар қатысты. Жүздесу барысында жазушы А.Кемелбаева балалық шағы туралы сыр шертіп, жазушылық жолға қалай келгендігін әңгімелей отырып, әдебиет арнасындағы уақыт белестеріне де тоқталып өтті.
Қазіргі қазақ әдебиетіндегі поэзия, проза жанрындағы тырнақалды туындылар жайында айта отырып, проза жазудың поэзия жанрына қарағанда әлдеқайда күрделі екендігіне тоқталып өтті.
Сұхбат барысында оқырмандар жазушыға көкейлерінде жүрген сұрақтарын қойып, жауап ала отырды. Іс-шара соңында, кітапхана ұжымы жерлес жазушымыз Айгүл ханымға толағай табыстар мен қарымды қалам тілеп, ақ жол тілесе, жазушы да өз алғысын білдірді.
