Ахмет Байтұрсынұлы ауыл мектептерінің мұғалімі: бейнедәріс

Абай атындағы кітапханада 2022 жылы 23 ақпанда ZOOM платформасында дәстүрлі «Алаш» жобасының кезекті бейнедәрісі өз жалғасын тапты. Жоба аясында Ахмет Байтұрсынұлы атындағы Қостанай университетінің профессоры, филология ғылымдарының докторы, ахметтанушы ғалым Алмасбек Ахметұлы Әбсадық «Ахмет Байтұрсынұлы – ауыл мектептерінің мұғалімі» тақырыбында бейнедәріс өткізді.
Аталмыш шара барысында қазақтың көрнекті мемлекет және қоғам қайраткері, ғалым, публицист, түркітанушы, әдебиет зерттеушісі Алаш ардақтысы Ахмет Байтұрсынұлының мектептегі ұстаздық қызметі жайлы баяндалды. Оның ауыл молдасынан, Торғайдағы 2 сыныптық орыс-қазақ мектебінен, Орынбордағы 4 жылдық қазақ мұғалімдері мектебінен білім алғандығы, 1895-1913 жылдары аралығында Ақтөбе, Қостанай, Қарқаралы уезіндегі ауылдық және болыстық мектептерде мұғалімдік қызмет жасағандығы тілге тиек етілді. Меңдіқара болысындағы Орынбаев атындағы бастауыш мектепте мұғалімдік қызметте жүріп, ауылдық бастауыш мектептерге мұғалім дайындайтын Қостанай педагогикалық сыныбында да сабақ бергендігі, Халық ағарту министрлігінің бұйрығымен Ақмола, Семей облыстарының халық мектептерінің директоры лауазымына тағайындалғандығы жайында әңгімеленді. 1903 жылы Абайдың шығармасымен алғаш танысқандығы және 1909 жылы Семей түрмесінде 9 ай жатқан А.Байтұрсынұлы жайлы «Казахский поэт в тюрме» атты Ә.Бөкейхановтың газетке жариялаған мақаласы туралы айтылды.
Ахмет Байтұрсынұлының ұрпақ сауатын ашуға қосқан үлесі, халқымыздың ағартушылық мәдениетінде алатын ұстаздық қызметі туралы баяндалған шараға белгілі алаштанушы қарағандылық Нұрсахан Ахметқызы мен қызылордалық Әбдіжәлел Бәкір сынды зиялы қауым өкілдері және шығыс өңірінің кітапханашылары қатысып, тиісті сұрақтарын қойып, алғыстарын білдірді.