Мерейтой кітаптар – қонақта: танымдық-ойын бағдарламасы

31 наурыз күні балалар әдебиеті бөлімінің қызметкерлері Халықаралық балаларға арналған кітап күнін мерекелеу аясында, Семей қаласының «Озерка» жалпы орта білім беру мектебінің оқушылары арасында «Мерейтой кітаптар-қонақта» атты танымдық-ойын бағдарламасын өткізді.
Халықаралық балаларға арналған кітап күні 1956 жылдан бастап Халықаралық кеңестің шешімімен жыл сайын дат жазушысы Ганс Христиан Андерсеннің туылған күніне орай атап өтіледі.
Іс-шара барысында балдырғандар кітаптың шығу тарихы, мерейгер-кітаптар, Андерсеннің өмірбаяны мен оның керемет ертегілері жайында көптеген қызықты мағлұматтар алып, «Ертегіні білесің бе?», «Мақал-мәтелді жалғастыр», танымдық викториналарға белсене қатысты және кітап туралы жұмбақтарды шешіп, қызықты ойындар ойнады.
Сонымен бірге жас оқырмандар назарына «Мерейтой кітаптар – 2022» креативті кітап инсталляциясы жасақталып, І.Жансүгіровтың «Құлагер», М.Әуезовтың «Абай жолы», І.Есенберлиннің «Алтын құс», А. К. Дойлдың «Жоғалған әлем», Сент-Экзюперидің «Кішкентай ханзада» және т.б әр кітаптың тағдыры, қызықты кездесулер мен шытырман оқиғаларын сипаттайтын мерейтойлық кітаптар таныстырылды.
Бағдарлама соңында балалар ата-аналарымен бірге үйде оқуға кітап таңдап алды.